Minister di Asunto Economico y Finansa, Xiomara Maduro, ta kere cu tanten no tin claridad, gobierno di Aruba no ta premira un medida pisa di parti di gobierno di Reino (Hulanda) den e proximo conseho di minister di Reino. Mientras cu e protagonistanan di henter e asunto aki no ta bisa e ‘cosnan manera nan ta,’ e situacion ta keda manera e ta, el a laga sa.
E mandatario a tilda e situacion aki di fastioso, ya cu nos ta biba bou palo di kwihi, caminda ‘bo tin cu wanta tur cos di parha,’ el a bisa. E mandatario ta haya cu esey ta pasa ora cu bo ta den Reino. E ta haya cu e problema actualmente ta sinta den e cambionan cu a haci den e ley di supervision financiero.
E mandatario a cuestiona e echo cu awor ta sali divulga den prensa cu gobierno di Reino a duna un deadline te dia 18 di october, creando un ambiente di temor y preocupacion na Aruba, siendo cu e mesun documentacion ta bisa cu nan a tuma nota di e carta cu minister president a manda. “Esey so!,” minister Maduro a expresa. Te ainda no tin mucho claridad riba e reunion aki.
Minister Maduro a relata cu den e ultimo reunion di conseho di minister di Reino cu a tuma luga na Den Haag diabierna 20 di september, gobierno di Aruba a informa cu no lo bin un KB. Tambe cu den e reunion aki e decision cu a tuma tabata encera –segun e mandatario- cu nan a tuma nota di e carta cu minister presidente a manda pa Secretario di Estado, Raymond Knops. Den e carta aki nos prome mandatario a indica cu Aruba no lo bay reenforsa e cambionan cu Parlamento a haci riba e ley di supervision financiero, LAft.
Segun minister Maduro, e decision den conseho di Minister di Reino e mes por a lesa a base di e reunion cu a tuma luga. Sinembargo gobierno di Aruba no mag di publica e tipo di documento aki ya cu nan ta ‘secreto.’
E mandatario a sigura cu el a les’e diaranson ultimo caminda ta skirbi na Hulandes: “Raad heeft kennis genomen van de brief.” Pues e mandatario a bisa cu absolutamente no tin nada di 18 di october como fecha stipula di parti di gobierno di Reino pa gobierno di Aruba cumpli cabalmente.
Ruiz-Maduro: ‘Periodista a bay hinca palabra den boca di Knops’ tocante deadline
Minister Maduro a relata cu e fecha di 18 di october a surgi a base di un declaracion cu secretario di Estado, a duna na un miembro di prensa, despues di e reunion di e conseho di minister di Reino. Segun e mandatario local, un periodista a entrevista prome nos Minister Plenipotenciario na Hulanda, Sr. Guillfred Besaril, caminda den su declaracion a expresa su satisfaccion cu no mester bay asina leu pa bin cu un KB, y cu gobierno di Aruba a haya tempo y espacio pa traha riba su plan pa atende cu asunto financiero.
Despues e mesun periodista a bay cerca Knops. Segun minister Maduro practicamente e periodista ‘a bay hinca palabra den boca di Knops.’ Eynan e ta haya cu a surgi e declaracion, caminda e Secretario di Estado a bisa cu pais Aruba tin te dia 18 di october pa reacciona. “Kiermen den e reunion niun momento a bisa algo di e fecha…,” minister Maduro a laga sa.
