Prome cu Minister President, Evelyn Wever-Croes a biaha pa Hulanda pa atende asunto di ‘aanwijzing’(instruccion di Reino), el a referi riba asunto di indexering.
Dificilmente gobierno por uza e surplus cu e presupuesto 2020 mester produci, ya cu nan tin un palabracion cu Hulanda cu e placa aki –di alrededor di 29 miyon florin– lo wordo uza pa paga debe.
El a bisa cu nan ta na mesa cu e sindicatonan di sector publico. Sinembargo e ta reconoce cu gobierno no tin espacio pa cuminsa paga indexering. Pero nan a papia cu e sindicato cu awor cu nan a cera presupuesto 2020, denter di e cuadro financiero di e presupuesto, nan tin un espacio cu nan por duna 30 florin pa luna den salario y no pafo di salario.
Nan a sinta diabierna ultimo cu e bloke sindical y loke gobierno a ofrece ta pa reconoce un parti di e indexering di aña. El a splica cu 1% ta wordo reconoci di tal forma cu empleado publico ta haya un dia liber. Tambe a ofrece cu parti di e indexering ta wordo paga na 2025, debi cu for di 2014 te cu 2024, ya caba gobierno ta pagando e inhaal cu gobierno anterior a palabra cu e sindicatonan.
“Ora cu esey caba cu nos gobierno ta pagando e. Nos ta bay cuminsa paga parti di e indexering di 2018,” el a bisa. Pues esaki ta loke tin ariba mesa, segun e mandatario.
