Durante temporada di cuarentena, ta hopi e cantidad di hende cu tin tempo liber y keda na cas debi na e restriccion di ‘shelter in place’. Pero tambe ta existi algun cu pa un of otro motibo ta sufri di stress of ansiedad, sali un rato for di cas y cumpra un par di drinks pa relaha e mente un rato.
Aruba ta conoci di ta ‘One Happy Island’ na unda su ciudadanonan semper ta feliz; pero na e momentonan aki tambe mester ta consciente di e pandemia cu henter mundo ta bibando y cu ta e momento pa keda cas.
Di esaki, por a mira cu ciudadanonan ta haci uso di beachnan cu famia y amigonan pa relaha e mente un rato, como tambe cumpra un par di drinks pa comparti na e momentonan. Hopi hende a critica e actitud aki y a pidi varios biaha pa gobierno actua pa cu esaki y implementa ley seco, pa evita cu e situacion lo sigui den dianan di cuarentena.
Durante un conferencia di prensa, minister presidente Evelyn Wever-Croes a señala cu e hecho di no bende mas alcohol ta un medida exigi den cierto casonan y loke pais ta bibando actualmente no ta exigi e medida di ley seco.
Di mesun manera, el a comenta cu ya gobierno a tuma e medida di cera bar y restaurantnan na unda e hende ta sinta paden y por ta nan ta bebe alcohol y keda cerca di otro. Y na e momento cu e samenscholing verbod a wordo implementa, tambe ta impedi pa esunnan cu ta cumpra alcohol keda para pafo di establecimento cu un grupo grandi di persona mucho cerca di otro.
Asina mes, Wever-Croes a splica cu e medidanan cu lo kier purba ta pa hende keda leu di otro. “Hende por cumpra un boter di biña y bebe den su cas, esey ta yuda na e momentonan aki.” Pero e medida di ley seco no ta un medida pa situacion cu nos pais ta aden actualmente.
