Parlamento no dispuesto pa realisa seriedad
Cu ministro di Infrastructura den parlamento so caba ta un garantia pa bochincha. No di banda di e parlamentario so, pero di e ministro tambe. Aki tambe e ehemplo bon di otro colega no ta yuda.
E topiconan tabata yama pa cuestionamento fuerte. Manera e problematica di emision di tereno, unda en berdad tin un practica por lo menos un poco straño. Referi na pasado den e sentido di “boso tambe a haci mesun cos” no ta bal aki. ‘Then was then and now is now’. No ta posibel pa condena mucho menos investiga gobiernonan den pasado. Esun cu ta duna cuenta awor, o lo mester haci esey, ta e gabinete actual.
Aki nos por mira un di e debilidadnan mas grandi di nos parlamento cu no ta actua den su papel di supervisor y controlado di loke gobierno ta haci. E custumber pa limita nan mes na defende ciegamente e ministro no ta solamente infantil, pero ta contribui na obstaculisa un debate berdadero tocante e cosnan cu ta importante. Pa keda na e topico aki: kico nos ta bay haci cu e anuncio di e ministro algun tempo pasa caba, cu maximo por tin mil (1000) tereno disponibel ainda. Ban sali di e punto di bista cu ta berdad, anto e discusion mester ta con nos ta bay atende e asunto di vivienda na Aruba. Por ta cu tin hende ta prepara caba pa esey? Tin cumpramento caba di tereno propiedad pa traha apartamento pero den diferente piso riba otro?
Esey ta un proceso riba su mes cu ta cana su caminda. Ta p’esey bo mester tin un ley riba desaroyo teritorial cu hende ta haya nan cu un edificio o actividad economico banda di su cas cu ta daña tur su ambiente di biba. P’esey ta importante pa sa kico e ministro ta bay haci cu e ley aki. Cuanto tereno cu awor ta area berde, no den sentido politico local, ta bay bira converti den tereno pa construccion, sea vivienda o comercio? Di loke nos ta comprende, e ministro no ta bay permiti un dialogo habri den comunidad pero kier regla asunto den secresia di su oficina. Y nos a mira caba ki resultado esey tin.
Pero e storia ta sigui mas leu: nos tin speculacion andando cu tereno propiedad di pueblo, es decir tereno erfpacht o tereno di huur, cu diripiente in famia ta perde y ta bay den man di otro hende di in momento pa otro? Tin caso di otorgamento di tereno cu ta cambia di doño inmediatamente despues di cu e persona o empresa a haya e permiso? Un tereno cu e dia anterior a haya sin paga nada, ta pasa den man di otro hende pa cien miles di florin o dollar? Anto nos tin in ministro cu un actitud di ‘esey no mi problema’!
Den tur pais unda e practicanan aki no ta desconoci gobierno(nan) ta haci intento grandi pa limita e peligro cu ta haci ganashi barbaro, anto na Aruba nos tin mandatario cu ta bisa cu e no ta preocupa cu esey, aunke el a bisa cu tanto palabra cu esey no por. No a puntra si por o no por, e pregunta ta kico e ta bay haci pa preveni e practicanan aki.
Comprende cu nos ta reacciona solamente riba asuntonan cu a sali den publicidad mustrando documento cu ta parce berdadero. Y si nan no ta, loke nos ta duda, anto ta na algun instancia gubernamental pa denuncia cu prensa ta purba crea tension cu documento falsifica, in hecho castigabel. Pero nos no a tende nada asina di banda di gobierno.
Loke ta di lamenta cu e bancada gubernamental den parlamento no ta realisa cu algun dia nan ta sinta na e otro banda y e mesun problema por surgi, y ta nan ta rasca djente, bin keha cerca prensa ‘wak kico nan ta haci cu patrimonio di pueblo.’ Nos lo tin nos contesta cla caba pa nan. E papel di controlado cu parlamento tin no ta di oposicion so, ta di henter parlamento. Ta ki crimen horibel mester sucede pa parlamento cuminsa investiga algo? Di e manera aki di berdad tur loke ey den no ta mas cu un formalidad y nos ta solamente perdiendo tempo dunando esaki atencion. E solo problema cu nos tin ta cu nos lo ta casi mes iresponsabel cu nan mes.
Sin embargo, tin mas cos pa considera cu e funcionamento patetico di e organismo aki. Y esey ta: kico ta e futuro? Si no tin tereno, bo no por bay traha cas den lama. Anto: kico nos ta haci? Nos ta bay traha vivienda den un otro set up, cu ta economisa henter e uzo di tereno, bay halto anto? Y nos ta bay haci esey na un manera ordena, o nos ta laga cada ken haci loke nan kier. Lo nos tin gana di mira e topico trata den parlamento, sin cu nos ta bisa cu mester djis considera e denuncianan di oposicion no relevante. Nan ta relevante pasobra sino nos tin o ta creando un pais unda crimen ta paga.
