Gobierno no ta mind… Otro ola di migracion…?

Aunke nos a dedica bastante atencion na e tema aki, nos ta sinti e necesidad pa reacciona despues di e alarma cu fundacion ABC a laga zona. Nos por comparti nan preocupacion pa e efectonan poblacional y demografico cu e aumento di acomodacion turistico lo causa pa nos isla, cu ta bastante devastador, pero e problemanan ta mas amplio cu esey. Nos mester busca kico por ta e motibo cu gobierno no ta toca e asunto aki.

Primeramente, e cifranan clave den e debate. Esakinan ta tuma na cuenta solamente e cifranan oficial cu Censo y Oficina Central di Estadistica (CBS) ta maneha, cu ta alrededor di 108.000 persona na e momento aki. Pero mester conta acerca sigur 15.000 pa 20.000 migrante Venezolano indocumenta, aunke tin calculacion mas halto ainda cu ta bay te 25.000. Riba esey mester conta tambe e otro indocumentadonan di otro pais, cu por yega sigur na otro 5.000 mas. Di e manera aki anto, nos ta pasando di e cifranan di poblacion cu ABC ta teme cu nos lo alcanza, si e ola di importacion di trahador stranhero pa satisface mercado laboral, tuma lugar den e proximo añanan. Kico esaki ta implica?

Cu si nos no ta resolve e problema di e migrantenan en general, y di e Venezolanonan en particular, con nos por deal di un forma planifica cu e problema di importacion di trahador pa nos economia? Nos no por simplemente ignora cu tin un forza laboral considerable na nos pais caba, cu ta visible pa tur hende menos pa nos autoridadnan…

Ki plan gobierno tin?

Den tur e discusion aki, loke ta haci falta ta un splicacion amplio y contundente di banda gubernamental. Al contrario, loke nos por, casi scucha, ta un silencio preocupante. Esey ta obliga nos haci e siguiente pregunta: Gobierno tin si of no, un contesta satisfactorio? E promer alternativa ta cu no tin un respuesta, loke ta sumamente grave pasobra lo mester reconoce cu mientras nos ta enfrentando un di e problemanan demografico mas serio den nos historia, nos mester yega na e conclusion cu no tin un maneho ni bon pensa, mucho menos aplica y menos ainda publica. Den e situacion aki lo ta absolutamente necesario pa cuminza traha riba tal maneho, aunke nos ta laat den e proceso y e crimen di demasiado acomodacion turistico a tuma lugar caba y mester enfrenta e problemanan cu ta e consecuencia.

E otro posibilidad ta cu na nivel gubernamental ya a tuma, sin bisa nos, e decision cu nan no ta preocupa pa un siguiente ola di migracion, pasobra banda di e efectonan negativo, e ta yuda, segun nan, resolve algun otro problema cu nos pais tin actualmente. Kico ta e caso? Contemplando e problema di un poblacion di edad avanza cu mester bay mantene, plus e hecho cu tin cada vez menos mucha ta nace, te na e grado cu nos no tin crecemento natural mas, e opcion ta pa laga miles di trahador extra drenta, cu ta bay trece extra ingreso aden pa AZV y AOV, ademas di otro impuesto pa gobierno. Esaki lo yuda pospone e problema a corto y mediano plazo di e aumento di persona di edad avanza y escasez di hoben local pa traha, pero a largo plazo ta crea un problema mas grandi ainda pa Aruba despues. Por ta cu nan ta pensa cu ‘kicking the can down the road’ en todo caso nan ta salba e situacion precario awor, resolviendo e situacion di escasez laboral actual y yena e cahanan di AZV y AOV cu fondo fresco, ‘matando dos pahra cu un solo tiro’? Si esey ta asina, kico ta e consecuencianan a largo plazo? Uno ta cu nos poblacion, cu ta acercando e punto caba unda e poblacion local ta bira un minoria den nan propio cas, lo no solamente bira e minoria ey, sino cu e gran mayoria di stranhero lo ta di origen Venezolano. Y kico ey anto ta e problema? E problema no ta e hendenan riba nan mes; e problema ta e regimen hostil, pa su ciudadanonan y pa nos, cu lo mira como algo positivo cu tin un mayoria poblacional di descendencia Venezolano na Aruba. Esey ta crea e base pa algun dia, proclama deseo di crea un union cu e republica di Venezuela. Esun cu ta kere cu e perspectiva aki ta algo di locura, djis contempla e siguiente hechonan. Desde implantacion di e regimen Chavista, cu tin casi 25 aña na poder, nos a mira e grupo di inmigrante cambia, di Colombia como pais mas contribuidor di migrante, pa Venezuela. Ojo: nos ta papiando aki di inmigrante legal. Riba esey mester conta e diezmiles di asina yama ‘refugiado’ Venezolano, cu lo haya status legal, cu vista riba naturalisacion a mas largo plazo, pasobra no tin perspectiva pa nan bolbe nan pais pa basta tempo. Si ta opta pa trece mas hende di exterior, tin dos pregunta: Uno, ki maneho lo tin pa scoge pais di prioridad? Venezuela, Colombia, o ta laga ‘casualidad dicidi’, manera den pasado? Dos: nos ta keda importa hende di e mesun manera desordena cu nos a mira pa 30 aña caba, y keda reproduci corupcion y mal maneho, simplemente aceptando esun cu a logra yega aki? Nos por laga cera un ministro o director de vez en cuando, pero esey ta yuda?

Finalmente, lo ta interesante pa conoce posicion di gobierno Hulandes den e asunto aki. Ta nan ta fiha maneho encuanto nacionalidad y naturalizacion den Reino Hulandes. Nan no kier tin nada di bisa den e proceso aki, cu por ‘regala’ nan diezmiles di ciudadano Hulandes nobo?