Minister Presidente, Evelyn Wever-Croes, kier a splica e trahadonan di e sector publico y semi-publico cu e parti di entrega di salario ta un di e condicionnan cu Hulanda a bin cune den e landspakket.

Actualmente Aruba ta den crisis ainda ocasiona pa e pandemia, y nos mester di e ayudo of prestamo financiero di Hulanda bao cierto condicionnan. Pa e motibo aki gobierno a pidi e trahadonan aki pa haci un corte den nan salario pa bay na e fondo di solidaridad di FASE, ya cu gobierno su entrada no ta yega pa paga FASE completamente.

Mas cu 11 mil persona cu a keda sin trabao por a haya ayudo di FASE, danki na e cortamento di salario cu a tuma luga den sector publico principalmente, pero tambe semi-publico.

 

Sinembargo na bispo y despues cu aña 2021 a habri tin trahadonan cu no ta dispuesto pa sigui entrega di forma boluntario. Prome Minister, Evelyn Wever-Croes a bisa na e matutino aki cu den caso cu nan no lo sigui entrega boluntariamente, gobierno no tin otro alternativa cu forsa nan legalmente. Den e caso aki lamentablemente e mester traha un ley pa en bes di boluntario, nan mester entrega forsosamente.

“Si mester pa nos haya financiamento, mi ta obliga di haci’e”, el a laga sa. E no ta bay permiti cu e pais aki kibra, pasobra un grupito di persona, mayoria di nan ta gana mas hopi placa cu ami mes como prome minister, pasobra e grupito di persona ey no kier mustra solidarismo.

 

Caso corte

Di su banda e sindicatonan cu ta representa e trahadonan di e sector publico manera SADA y tambe semi-publico, manera SIWA a yega expresa cu nan semper a mustra nan bon boluntad y solidarismo, y esey a keda demostra aña pasa. Sinembargo situacionnan cu nan a yega di denuncia publicamente cu no tabata bon pa nan concepto a crea un ambiente di desconfiansa y falta di credibilidad di parti di gobierno cerca nan.

E malcontento aki a conduci cu SIWA a entabla un caso caminda su veredicto lo ta crucial den e proceso di sigui entrega na e fondo di solidaridad y garantisa FASE su existencia. Di un banda, Prome Minister Wever-Croes ta contento cu e sindicato aki a scoge pa bay corte y no bin cu accion cu por perhudica mas nos pais.

Riba e punto aki, premier Wever-Croes a bisa cu e ta compronde como hurista cu nan ta bay corte, ya cu e posicion ultimo bo mester lag’e den man di hues. Pero el a expresa SIWA su preocupacion, pasobra ‘si nan ta gana e caso den corte henter Aruba ta wordo perhudica.’ Specialmente door di un grupo di hende cu no kier duna solidarismo y nan no ta e grupo di hende cu ta gana menos den nos pais. “Ta un grupo di hende cu por entrega un poco mas pa yuda esnan cu a perde tur cos,” el a declara.

Malcontento

SIWA su malcontento ta cu nan a sacrifica y entrega como un gesto di solidarismo na FASE. Mientras cu otro cu mester a haci’e, no a cumpli. Mientras no tabatin un fiscalisacion of control di parti di gobierno riba e parti ey.

Mientras SADA a yega di trece dilanti cu gobierno ta pidi solidarismo, mientras cu e solidarismo no mester bin di un banda so. Nan ta wak un Cocolishi carga di hende. Mas hende ta wordo tuma y contractnan innecesario di e coordinadornan cu ta aumenta gasto di gobierno ta wordo renoba.

Minister President su contesta na Bon Dia Aruba tabata cu el a sigura SADA, cu nan como minister y parlamentario a entrega hasta 25%. Encuanto SADA su critica riba e toelagenan cu e ministernan ta haya, el a responde cu ora cu nan a entrega un 25% di nan entrada, tambe tur toelagenan a wordo kita.

Igualmente riba e hendenan cu a wordo tuma den servicio, e mandatario a contesta cu el a splica SADA con e proceso aki ta bay. Gobierno tabatin 160 persona cu a sali for di servicio publico aña pasa. Pero un 40% di nan, nan mesun hefe di departamento a pidi pa reemplasa cu otro hende. Esaki a base di e hefe di departamento y conseho di Departamento di Recurso Humano (DRH).

Mas tanto esaki ta sosode den departamentonan vital di gobierno pa nan sigui brinda e servicio y no na Cocolishi, el a sigura. “No pasobra minister a dicidi of pasobra ami kier…,” el a bisa.

El a referi riba e tema di hendenan of coordinador cu ta traha cerca cada minister na Cocolishi. E mandatario a trece como ehempel cu SADA semper ta pidi reunion cerca dje constantemente, pero e no tin tempo. Tampoco e no tin suficiente hende cu ta traha cune pa por atende nan. Si talbes e tabata mas hende den su servicio e por atende nan, el a splica. E ta haya cu nan ta e prome gobierno cu a bini cu un limite riba e cantidad di hende cu ta traha cu cada minister. Den su caso el a bisa cu ta 25 persona maximo, y nan no ta tumando mas hende den nan servicio.

Argumentonan

E prome mandatario ta consciente di e kehonan aki, ya cu nan a wordo treci dilanti tambe siman pasa, durante e reunion cumbre cu nan a sostene cu e sindicatonan cu intermediacion di Mediador di Gobierno pa pidi cooperacion di nan.

Segun e mandatario nan por a comprende e ponencia di SIWA. Pero e no ta kere cu e argumento cu nan a trece dilanti ta uno valido pa no sigui aporta di forma boluntario na e fondo di FASE.

E mandatario ta haya cu algun di e companianan di e sector publico y semi-publico tabatin nan motibonan. Nan ta companianan cu no haya entrada y nan ta draai den perdida semper, manera Arubus y Postkantoor. Mientras cu WEB no ta draai den perdida. Te hasta nan a cera aña pasa cu ganashi.

P’esey WEB si a logra pasa e placa pa e fondo di solidaridad. Mientras cu e companianan menciona ariba ta dificil pa exigi pa nan pasa nan placa pa FASE, ya cu nan mester di dje pa nan operacion.

“P’esey nos a duna algun e oportunidad pa no pas’e na e fondo di FASE, y e otronan si,” el a bisa. Pero si tur a wordo corta entre nan Banco Central, APFA, pero algun a pas’e pa e fondo di FASE y otro nan no.

 

Den e caso aki premier Wever-Croes ta haya cu e companianan estatal cu normalmente ta duna gobierno dividendo, mester sigui duna gobierno e sosten aki, specialmente den e circunstancia dificil cu nos ta aden. Vooral aworaki cu gobierno a asumi e responsabilidad di cuida di e trahadonan di e sector priva. Un responsabilidad cu gobierno no tabatin prome di e pandemia.