A pesar di e cortamento di gasto debi na e situacion economico produci pa e crisis di coronavirus/Covid-19, gobierno no ta bay mishi cu e pension cu nos grandi ta ricibi for di Banco di Seguro Social (SVb).
Minister Presidente, Evelyn Wever-Croes a anuncia cu e pensionadonan di SVb no ta bay mira niun cambio, ni den nan entrada mensual, tampoco den e bono cu nan ta haya di fin di aña.
Sinembargo e pensionadonan cu banda di e pension di behes di SVb ta ricibi for di APFA e pension di gobierno, tin un grupo di e pensionadonan aki cu ta haya un bonus na november.
El a splica cu pa esunnan cu a baha cu pension prome cu 2014, nan ta haya e bonus aki di alrededor di 3 mil florin. Ya caba el a laga sa cu e bonus ey, mita di dje ta wordo corta den november venidero. Esey ta locual pensionadonan di APFA ta entrega so, el a bisa. E pensionadonan cu a baha cu pension despues di 2014 no ta bin hayando e bonus aki. Kiermen e pensionadonan aki tampoco no ta entrega nada.
El a bisa cu gobierno ta consciente cu nos pensionadonan ta un grupo vulnerabel y nan ta trahando pa percura cu e fondo di SVb por keda uno solido y firme pa nan por sigui paga e pension na nos grandi.
