Gobierno no por… Dicidi pa caba…?

Pa di tantisimo vez nos ta haya nos den e situacion unda ta urgente pa tuma decision… y nada ta sucede. Nos tin mas di un luna caba den e proceso aki di tuma medida pa e crisis di coronavirus cu no a asalta nos so, sino henter mundo. E asalto tabata mescos, pero e contestanan no. Y exito tambe ta varia segun e contesta. Cerca nos, con cu bay bin, mester bisa cu e maneho di e crisis di salud mes a bay hopi bon, despues cu mester a coregi algun asunto cu no tabata cubri bon. Dianan ta pasa y e casonan positivo no ta aumenta. Nos por cuminsa pensa riba e siguiente pasonan cu mester tuma. Y ta aki cosnan ta cuminsa pega.

Riba e erornan cometi na promer momento unda a cana obedientemente tras di e ministro encarga cu labor, loke a coregi, awor nos ta pega cu un negociacion ‘eterno’ cu e sindicatonan cu ta representa empleado publico y sectornan liga na gobernacion. Aki a cuminsa malo dunando e sindicatonan e impresion cu si nan no ta di acuerdo, nada ta sigui. Esey ta un impresion falso pasobra gobierno mester ‘deliver’ y no cerca e sindicatonan, sino di unda e placa ta bin. Ta asina dificil pa duna e hendenan aki di comprende cu esaki no ta un negociacion normal di CAO o areglo di indexering den tempo di paz, sino cu ta trata di medida pa lucha den un guera cu nos niun a busca y niun tabata desea?

Claro cu e asunto aki, si e no termina cu un acuerdo, esey lo tin como consecuencia cu gobierno mester tuma un decision y para pa esaki. Esey ta zona dificil pero e no ta imposible, y ademas hustificable dilanti e gran mayoria di pueblo cu no ta empleado publico. Ademas, no ta promer biaha cu esaki ta sucede. Durante e gabinete anterior tabatin negociacion interminable tambe den e dialogo social encuanto e aumento di edad di pension. Tempo tabata preta pasobra mester a hiba un propuesta parlamento cu dificilmente, bao presion internacional y presion Hulandes, por tabata otro cu e aumento pa 65 aña, pasobra e cifranan tabata mustra cu 62 aña no tabata suficiente. Finalmente e sindicatonan a nenga di firma y e ministro presidente di e tempo ey no por a haci nada otro cu bay parlamento y pasa e cambio drastico aki. Y kico a pasa? Discordia, disturbio, protesta riba caya? No, silencio, y pakico? Pasobra e mayoria a comprende cu no tabata por otro, punto. Claro cu e contrincante politico di e tempo ey, awor den gobierno, a campaña cu e lema di baha pension pa 62 aña, a pesar cu nan mes sa masha bon cu esey ta imposible. Nan tin dos aña y pico sinta y no por cumpli cu e promesa di campaña ey, awor mucho menos pasobra e fondo di SVb ta un di esunnan cu a haya e golpi mas duro den e actual crisis. Pues esey ta un discusion cu nos no mester hiba mas.

Loke nos kier ilustra aki, cu no semper e acuerdo entre gobierno y sindicato ta e elemento clave y indispensable. Si den e dianan aki no yega na un acuerdo, gobierno mester sa di tuma un decision y e sindicatonan lo mester biba cune. Pasobra loke ta hiba na mesa na Hulanda ta conta, no kico eventualmente a palabra cu sindicato. Y nos tin miedo cu hasta e proposicion mas pisa di gobierno no lo impresiona na e mesa (virtual) ey. Si di berdad gobierno tin miedo cu si nan sigui papia asina, aki un par di luna no tin placa pa paga niun y ningun, anto e tiki cu nan ta dispuesto pa corta, tampoco lo yuda.

Di otro banda, e sindicatonan ta trece varios punto importante dilanti. Ta tempo pa gobierno, si nan ta sincero, cuminsa caba cu e anomalia y abusonan cu ta comete den gobierno y den e empresanan estatal. Bo no por mustra sincero si no ta reconoce y actua riba e cosnan aki. Pero, finalmente e placa grandi no ta bin di esey, e placa cu ta haci e diferencia ta e reduccion di salario riba henter e 8000 y pico salario cu gobierno ta paga tur luna. Ni cu ministronan bay traha pornada, esey riba e centenares di miyones necesario no ta haci e diferencia. Y pakico e lo mester bay di e manera aki, cortando ‘across the board’? Pasobra e otro instrumento, kita hende di trabao, nos ta usable; no tin tempo pa esey.

Hopi hende den e dianan aki ta expresa e opinion cu ‘awor no ta tempo pa politica’. Nan tin razon, awor ta tempo pa actua como estadista y no como politico. Es cu ta sinta como gobierno lo haya golpi politico di tur manera. E miedo panico cu tur gobierno a mustra den e ultimo trinta y pico aña pa e sindicatonan, loke a hiba nos na e crecemento desproporciona di e aparato publico, te na un punto cu nos no por paga e cos aki mas, ta presente ainda pero ta imposible pa tuma decision na fabor di sindicato, pasobra ‘no ta trata di nan, ta trata di nos’. Nos, Aruba.