Minister di finansa y economia, Xiomara Ruiz-Maduro a bisa cu e lo reuni pronto cu Camara di Comercio (KvK) pa atende diferente asunto, entre nan, esunnan cu KvK a trece dilanti durante nan conferencia di prensa di diabierna ultimo.
E mandatario por a tuma nota cu KvK a pidi pa reconsidera e fecha di 1 di juli awor pa comercio kita for di nan recibo e BBO cu ta wordo cobra na e consumido, y haci e calculacion aki riba e cambio di prijs di e productonan cu nan ta bende riba mercado.
E mandatario no kier a bisa si gobierno lo honra e peticion aki di biaha. E lo prefera pa sinta prome cu e gremio comercial aki, pa mira si tin un espacio pa larga un poco e cumplimento di e ley aki, pa asina nan tur por cumpli cune.
E minister a bisa cu nan a yega di sinta cu KvK siman pasa, prome cu el a biaha pa Cuba. E por mira cu ‘nan a compronde e cosnan di un manera diferente’. Esaki ta rekeri pa sinta bek na mesa, pa gobierno por duna splicacion na KvK riba e asunto aki. Ya cu decision a yega di cay y leynan a wordo cambia. No ta asina cu esaki mester acopla na otro decision. “E decision no a bin ainda,” el a bisa. Igualmente gobierno no por acopla otro decision relaciona na otro sistema di BBO.
Tambe el a referi na e carta cu a wordo manda unda –segun e mandatario– explicitamente KvK ta wordo bisa cu nan a haya 6 luna pa bin cu e cambio riba recibo y prijs di e productonan. Ya cu despues di 6 luna, gobierno no lo duna mas prolongacion. Ora e ley a pasa december ultimo, a duna 6 luna pa gremio comercial por efectua e cambionan necesario.
Cifra
Un palabra cu a bin for di presidente di Camara di Comercio, y cu e mandatario a cuestiona, tin di haci cu gobierno a wordo tilda di hiba un maneho dictatorial. Segun e mandatario, gobierno actual ta leu di ta uno dictatorial. Nan a reforsa e departamento di estadistica of CBS pa realisa investigacion y bin cu e cifranan cu ta wordo produci –prome cu gobierno ta tuma un decision– y divulga nan publicamente como un pais democratico.
“Esaki tabata un problema cu nos tabatin. Aworaki tin cifra y tur hende por bin crioyamente bisa: bati bo mes cu cifra!,” segun e mandatario. P’esey e ta haya cu e palabra dictatorial no ta uno cu ta pas cu su gobierno. Pero si e ta puntra su mes cu tur e tempo anterior cu e cifranan no tabata t’ey, of cu gobierno anterior no tabata divulga nan, no a wordo bisa cu e maneho ey tabata dictatorial.
Ruiz-Maduro a afirma cu gobierno lo yama KvK pa papia cu nan, pasobra e ta haya cu e tipo di discusion aki ta uno pa hiba na mesa y no pafo di mesa.
