Gobierno no mag cay… Pa via di Serlimar…?

Politica no ta solamente intriga, purba lesiona y herida e contrincante, gana voto riba su custia, pero ta tambe e arte di negocia: si bo duna mi esey, anto bo ta haya esaki di mi… Den e dianan aki nos ta testigo di negociacion intenso pa loke ta e ley di Serlimar. Tin sigur algun miembro di e partido grandi den gobierno, cu tin bastante dolor di bariga cu e manera cu a presenta e ley aki, y cu e puntonan di salida di e ley cu ta duna hopi di pensa.

Ademas cu nan ta sinti tambe e presion di e votador, cu no simplemente ta sigui e punto di bista di e ministro concerni, djis pasobra nan ta den e coalicion. No tin confiansa y lealtad eterno pa loke ta cualkier partido politico, esey ta loke nos tur por comproba den e historia reciente di nos pais.

Naturalmente ainda tin hopi hende cu ta describi e electorado na Aruba como dividi entre geel y berde, mientras cu esey ya no ta asina mas. Pasobra si esey tabata asina ainda, anto con nos ta splica e cambionan drastico, e victorianan ‘landslide’ na 2001, 2009 y 2017 cu a termina cu gobiernonan cu tabata haci nan mes gradualmente impopular cerca hopi hende cu nan tabata kere cu ta eternamente fiel na nan, te cu resultado di eleccion a mustra diferente. Si nos ta acepta e realidad aki, anto mester ta asina, pa cualkier partido politico, cu nan mester tene cuenta cu loke nan ta haci, den oposicion y mas ainda den gobernacion.

Segun nos opinion, un asunto manera e cambionan den e ley di Serlimar cu e ministro concerni ta propone, por bay tin consecuencia grandi, no inmediatamente so, sino tambe aki dos aña si nos mester bay vota atrobe. E partidonan den parlamento anto mester tene debido cuenta con e asunto aki lo bay afecta nan den futuro, y esey ta cuminsa cu nan actuacion den parlamento. Pa cuminsa e avalancha di pregunta cu e ministro a haya pa contesta, ta muestra cu pasa e ley no ta un simple votacion unda tur hende ta vota ‘bon mucha asina’ segun orden di ‘ariba’. P’esey tin demasiado cuestionamento di e forma cu ta pretende di hiba e asunto aki, unda no tin respuesta riba diferente aspecto cu no por keda sin tuma na cuenta. Por ehemplo, e repercusion cu e ‘unlevel playing field’ cu ta creando cu e ley aki por trece cune, banda di sin duda algun e casonan den corte cu lo bay tuma lugar di banda di e empresanan, ademas di otro actornan cu a anuncia caba cu nan ta bay corte den e asunto aki.

Si Aruba lo tabatin un Corte Constitucional, sigur e ley aki, si e pasa manera e ta formula awor, lo topa cu bastante contratiempo pa convence e Corte cu pa bienestar general ta necesario pa faborece un compania estatal cu ningun dia no por a ni mustra con bon o con malo e ta opera, pasobra no tin ningun cuenta anual aproba. Esey no ta algo pa critica e actual ministro p’e, tur su predecesornan a laga di desea den e tarea mas importante cu un mandatario tin: administra drechi. Mester bisa si cu den e casi dos aña cu a transcuri na nos humilde opinion no ta mira tanto cambio positivo ainda den operacion di e empresa, y pa esaki bay asumi tur e tareanan cu ta describi actualmente den e ley, ta mustra ‘one bridge too far’ pa alcansa. E ora ta surgi e pregunta tambe pakico ta asina importante pa desvia di e caminda cu, consciente o inconscientemente, a tuma varios aña pasa caba: esun di, como empresa estatal, comparti mercado cu empresanan di iniciativa priva. Purba bolbe na un (semi)monopolio estatal despues di tanto aña no ta parce e caminda indica. Mester por tin en general, y esey independiente di e debate tocante incinerator of exportacion, un discusion sano di con ta sigui comparti mercado entre empresa gubernamental y empresa priva, y cumpliendo cu e metanan cu pa Aruba ta importante.

Y kico anto ta importante pa Aruba? Resolve e problema di recoge y procesa desperdicio na e forma mas racional y razonable posible, respetando e punto di salida cu no por ta meta di gobierno, ningun gobierno, pa perhudica interes genuino di empresa priva, cu pa tanto decada gobierno mes a permiti competi riba e tereno aki. Ta aki unda parlamento mester tene debido cuenta, evaluando tur interes cu tin. Pa haci esaki, pa cuminsa mester tin tur informacion necesario. Si nos ta keda biba den e era unda ta mandatario ta dicidi ta kico ta duna na informacion, y parlamento mester ‘djis cumpli y vota manera instrui’ anto ta bira tempo pa e parlamento aki, cu a mustra asina hopi ‘curashi’ contra Hulanda, demostra awor tambe cu nan ta ‘autonomo’ y e organo mas halto, si nan ta desea di gana algo di nan credibilidad atrobe cu nan a perde recientemente.

Y nan no mester tene miedo cu gobierno ta cay. Pasobra si mester yega asina leu, ta ken ta bay paga e consecuencianan den un eventual eleccion? Nos lo mira ken ta ‘call the bluff’ di ken den e dianan aki.