Director di Banco di Seguro Social (SVb), sr. Edwin Jacobs a nenga rotundamente cu gobierno a pidi SVb un contribucion di 60.5 miyon florin fei e fondo di pensioen (AOV). “Mi por trankilisa comunidad cu e fondo eynan cu tampoco nos no tin, no ta fondo cu ta bay sali for di e fondo di AOV. Mi no ta conoci cu esey, y no a bin niun peticion tampoco”, el a bisa. Si un sorto di peticion asina ta yega na SVb, tampoco e instituto aki no por cumpli cun’e, pasobra “no ta asina cu e fondonan ta wordo transferi den nos sistema estatal”, el a agrega.
Condicionnan traspaso fondo
Director di SVb a bin cu e clarificacion aki despues cu el a lesa un articulo publica den Bon Dia Aruba su edicion di ayera (pag A12), caminda lider di fraccion di MEP, sra. Evelyn Wever Croes ta indica cu awor cu e fondo ta fuerte gobierno di Prome Minister Mike Eman a bay bati na porta di SVb pa pidi un donacion di 60.5 miyon florin.
“Mi tin cu cuminsa bisa cu e parti akinan no ta asina. E no ta cuadra cu e realidad”, asina sr. Jacobs a declara na Bon Dia Aruba.
Pa evita cualkier malinterpretacion, sr. Jacobs a bisa na e matutino aki cu absolutamente SVb no a ricibi niun peticion di Gobierno pa nan traspasa un suma asina fei di SVb su fondo pa Gobierno.
Ademas pa un asunto asina tuma luga mester tin dos condicion: Un di nan ta cu SVb mester tin e fondo ey y actualmente SVb no tin 60.5 miyon florin. El a laga sa cu e fondo di pensioen di behes (AOV) ta den recuperacion, pero SVb no tin e fondo ey. Nan ta bay cera aña cu alrededor di 19 miyon florin di likides. “Sigur, sigur, fondo cu bo no tin, bo no por traspasa tampoco”, el a afirma.
E di dos condicion cu sr. Jacobs a menciona tin di haber cu cualkier traspaso di fondo fei di e fondo di SVb tin cu tuma luga mediante un ley. Director di SVb a indica cu na 2003 y 2004 a traspasa 19 miyon florin fei fondo di e seguro di malesa pa manda pa e fondo di AOV pa medio di un ley. “Ta fondo di pueblo y e legisladonan so por haci esey”, el a afirma.
Separacion di bienesnan
Director di SVb ta kere cu eventualmente loke por a pasa riba e supuesto traspaso di fondo, ta relaciona cu un ley cu aña pasa a pasa den Parlamento, y a drenta na vigor e aña.
E ley aki tin di haber cu tabatin un debe di gobierno na e fondo di AOV den cuadro di separacion di bienesnan entre Antia y Aruba, tempo cu nos isla a sali fei di Antia.
Antia tabata debe e suma ey di alrededor di 60 miyon florin cu gobierno nunca a traspasa pa Aruba. Fei di 1990 te cu e aña aki e suma a keda acumula interes. Aña pasa a exonera gobierno di e debe ey. “Probablemente pa motibo cu a exonera e debe ey na Gobierno a crea espacio pa gobierno por fia extra, y asina por a keda mantene su mes na e relacion entre GDP y debe”, director di SVb a bisa. Pero esaki no kiermen cu ta fondo cu a sali fei di SVb.
