Prome Minister Evelyn Wever-Croes a referi na e reunion cu conseho di minister tabatin cu Colegio di Supervision Financiero (CAft) siman pasa.

El a aclaria cu den e reunion aki no a wordo trata e asunto di e ‘aanwijzing’ (instruccion) cu CAft a conseha pa Conseho di Minister di Reino pa Aruba. E prome mandatario a bisa cu esaki no ta un asunto cu como gobierno nan tin cu atende cu CAft cu ta un organo di supervision financiero. Sino cu esaki ta un asunto cu nan mester atende politicamente cu Hulanda.

Tin varios preocupacion ‘genuino’ cu e prome mandatario ta reconoce cu CAft a trece dilanti durante nan reunion cu Conseho di Minister. Ta asina cu aunke CAft ta haya cu pais Aruba no ta haciendo suficiente y cu no ta tumando suficiente medida, gobierno ta compronde nan preocupacion. Pero nan no ta comparti cu CAft e forma cu nan kier pa gobierno haci’e.

“Nos a bisa nan cu nos ta trahando riba alternativa y menos medida,” el a bisa. E tin comprension cu ya caba pueblo ta cargando hopi, pero lamentablemente e situacion di finansa publico no ta wordo sanea pronto.

Puntonan di preocupacion.
E mandatario a indica cu loke CAft a trece den prensa ta e mesun preocupacion cu nan a trece den nan reunion tambe. CAft ta spera cu gobierno lo alcansa e norma di deficit acorda den presupuesto 2019 di un deficit di 25 miyon florin of 0.5% di e GDP. Pero pa 2020 -cu ainda gobierno ta trahando riba e presupuesto aki- CAft tin su preocupacion muy particularmente riba gasto di personal y belasting plan.

Pa loke ta e dos punto di preocupacion aki di CAft, e prome mandatario a bisa cu gobierno tambe ta comparti e preocupacion aki, pero gobierno tin nan prioridad y nan ta trahando riba dje. Pa loke ta e gasto di personal, el a bisa cu gobierno tin un plan y a base di esaki, nan tin cu percura pa no surpasa e suma di 479 miyon florin na salario di ambtenaar, y percura tambe pa 2020 por baha mas.

Pa cu e tema di belasting plan, Premier Wever-Croes a bisa cu den nan reunion cu CAft, gobierno a trece dilanti cu e colegio di supervision aki no mester mira cu e fondonan cu Aruba mester pa cuminsa paga su debe mester bini solamente di belasting. Di un banda e por bin di belasting; pero di otro banda e por bini di otro entradanan cu gobierno mester genera pa cera e buraco den e presupuesto di pais Aruba. Den esaki nan a duna nan splicacion.

Entrada incidental.
Otro preocupacion di CAft cu premier Wever-Croes ta reconoce como uno ‘genuino’ ta esun cu e dependencia di entrada incidental ta demasiado grandi, locual ta trece riesgo cu ne.

Pues e ta haya cu sin duda e ta un preocupacion, si bo ta basa bo mes riba entrada incidental y no structural. Sinembargo -el a bisa- cu na 2019 esey no ta e caso. Nos ta logrando nos presupuesto a base di entrada pa atende cu e gasto di personal via entrada structural. Pa presupuesto 2020 cu nan ta cerando, e no ta mira un riesgo tampoco.

El a bisa cu e echo ta cu pais Aruba por keda haya entrada incidental, pero e no mester ta ariba di locual nan tin palabra. E ta haya lamentabel cu den e palabracion cu a wordo haci, Hulanda no kier pa gobierno uza entrada incidental pa inverti den scol, cas di anciano, etc… sino cu e entrada aki mester wordo uza pa paga debe.

E prome mandatario a declara cu nan tambe ta preocupa cu e parti di entrada incidental y nan ta monitor constantemente pa cumpli cu e normanan cu decision structural.