E echo cu gobierno ya a firma contractonan cu Citgo sin aprobacion di parlamento no ta algo inusual, segun prome minister Mike Eman awe mainta. Bon Dia a puntra dicon gobierno no a puntra parlamento aprobacion prome cu a bay firma e contractonan cu Citgo na Venezuela.
Esaki ta mas tanto e procedura cu por a mira tambe cu firmamento pa otro proyectonan grandi, segun e mandatario. Su colega minister di Energia Mike de Meza ta contesta awe mainta tambe cu den e caso cu parlamento di Aruba no ta aproba e contractonan (y leynan necesario) firma na Caracas diabierna, e contractonan aki no tin validez.
Pero ambos mandatario no ta kere cu parlamento lo disaproba nan pasobra den fraccion AVP y di oposicon MEP ya tin consensus pa e reapertura di e refineria na San Nicolas. Ambos partidonan a sostene y of entrega mocionnan den pasado pa urgi gobierno habri e refineria bek.
Awor e contractonan y e leynan necesario ainda ta den e proceso pa bay parlamento. Raad van Advies tambe lo bay duna su comentario riba e ley y despues lo sigui bay parlamento. Ainda gobierno ta spera cu tur cos ta rond prome di 1 augustus pa cuminsa cu e trabou di restart e refineria. E prome fase ta tuma mas o menos 2 aña y e ora e refineria lo produci mas cu 100.000 bari pa dia. Despues lo sigui e di dos fase pa yega a capacidad di algo mas cu 200.000 bari pa dia.
Aprobacion parlamento Venezuela
E echo cu for di parlamento di Venezuela (Asamblea Nacional) a bin e comentario cu e contractonan ta ilegal pasobra gobierno no a pasa nan prome na parlamento pa aprobacion, esaki tampoco Eman ta pensa ta un problema. E no ta kere cu tur contracto cu Citgo ta firma afo ta pasa parlamento Venezolano pa aprobacion. “Mi no ta kere esaki ta un argumento basa realidad di tur dia di un compania manera Citgo.Mi ta kere tambe cu diariamente Citgo ta firma contracto cu tin mas impacto cu esaki.” E comentario a bin for di e vice presidente di comision di energia y petrolio di e parlamento Venezolano cu a indica cu tur contracto cu ta toca interes general di e pais y cu ta cera cu paisnan afo, mester pasa parlamento segun regla den constitucion.
Minister De Meza a confirma awe tambe cu e contractonan principal pa cu e referineria, a wordo firma diabierna pa Citgo Merca. Pues no cu Citgo Aruba (so) manera cierto prensa internacional a publica.
