Gobierno nacional di Colombia ta bay financia e proyecto di metro di capital Bogota. Segun Planeacion Nacional, esaki significa cu e districto capital a cumpli cu tur e rekisitonan cu ley di Infrastructura Nacional ta prescribi, pa un proyecto di e magnitud aki por haya financiamento di gobierno nacional.
Loke ta sigui awor ta cu Bogota mester tramita cu e conseho di Bogota e compromisonan di aportacion financiero den futuro, es decir e recursonan di cual por dispone den e proximo añanan, como contrapartida pa e construccion di e obra.
E idea ta cu ta realisa e tramite rapidamente pa e nacion y e districto por firma e convenio interadministrativo cu lo permiti habri e proceso di licitacion.
E Conseho Nacional di Politica Economico y Social (Conpes) a conseha pa gobierno nacional declara e proyecto di e prome linea di metro di Bogota di importancia strategico, cu cual lo duna viabilidad na e tramite cu e Alcaldia mester haci cerca e Conseho di e districto pa aproba e aportacionnan financiero den futuro. Pa haci esey, gobierno nacional lo expedi un certificacion na Bogota cu e mega proyecto ta un obra strategico pa gobierno nacional.
Ta prome biaha den historia di e pais y e ciudad cu un linea di metro ta ser declara di importancia strategico, e director di Planeacion Nacional, Luis Fernando Mejía, a declara.
El a splica cu e tarifa di metro lo ta e mesun di TransMilenio, na e momento cu e linea cuminsa opera, loke ta calcula pa tuma luga na 2024.
E funcionario a señala tambe cu e garantia cu e recursonan lo wordo poni disponibel, entre 2019 9y 2048, ta duna y cu awor e proyecto ta den cancha di e districto capital cu mester obtene e aprobacion di su conseho, cu tambe mester garantisa e aportacion di su contra parte.
Gobierno nacional a aclara cu cualkier riesgo futuro cu por surgi lo mester ser asumi pa e districto, pasobra e gobierno nacional tin solamente espacio fiscal pa aporta 9,09 triyon di peso (US$ 3.000 miyon).
