Durante conferencia di prensa di gobierno ayera mainta prome minister Evelyn Wever-Croes (MEP) hunto cu mandatario di husticia Andin Bikker (POR) a aclara un poco riba e situacion actual desde cu presidente di Venezuela Nicolas Maduro a anuncia prohibicion di trafico aereo y maritimo entre Venezuela y islanan ABC pa 72 ora.

E prohibicion of ceramento di frontera segun e prome mandatario lo mester caduca entrante awe mainta. Aunke cu sra. Wever-Croes ta reconoce cu podise lo tin poco exageracion den e manera con gobierno Venezolano ta declama cu tin un problema serio di contrabanda riba lama entre e islanan y e pais Latinoamericano, e mandatario a splica cu tin di reconoce cu esaki claramente tin su berdad esencial.

Personanan pega na Venezuela

Actualmente tin rond di shen hende pega na Venezuela cu vuelonan cancela. Esaki ta pasobra vuelonan directo no por pasa. Segun e mandatario a tuma contacto cu algun famia den fin di siman y a conseha nan pa boek otro vuelo via paisnan manera Panama, Colombia of Santo Domingo cu si lo por conecta pa vuelo direccion di Aruba. Pa loke ta trata e ayudo cu e e personanan cu ta pega na Venezuela lo por haya, e mandatario a splica cu embahada di Reino ta habri pa yuda tramita vuelonan via otro canalnan, por ehempel Santo Domingo. E ayudo aki no ta encera ningun ayudo financiero, solamente asistencia pa haci e tramite posibel. E posibilidad ainda t’ey pa bay riba vuelo directo di Aruba pa Venezuela, pero no pa bin bek di Venezuela pa Aruba riba un vuelo directo.

“Nos ta conseha cualkier persona cu bay pa regla un vuelo indirecto pa asina yega Aruba bek.” Sinembargo e mandatario a enfatisa cu e conseho di ministerio di Relacionnan Exterior di Reino ta duna pa drenta Venezuela ainda ta vigente. “Si bo no tin cu bay, no bay.”

Diplomacia

Mas aleu e mandatario a lamenta cu a bin na e decision aki pa asina trece un cambio den e situacion actual di contrabanda. “Di e manera aki e nomber di Aruba ta wordo saca malamente den exterior.” Segun e mandatario, gobierno Venezolano a expresa cu gobierno di Aruba anterior a neglisha e punto aki, cual a resulta na e situacion alarmante cu nos ta den dje awo. P’esey mes sra. Wever-Croes a tuma contacto cu director di Departamento di Relacionnan Exterior pa asina e por tuma contacto cu Consulado General di Venezuela na Aruba pa asina hiba discursonan dilanti di manera diplomatico.

Pero e palabracionnan no ta solamente cu gobierno di Aruba. Maske e preocupacionnan mas grandi di gobierno Venezolano ta relaciona cu Aruba, embahador di Reino a reuni cu vice presidente di Venezuela. ‘Palabra a wordo hiba dilanti cu Aruba ta serio den combatimento di criminalidad’, e mandatario a expresa. “Porta berdad e medidanan ta exagera, porta berdad e lo tin otro medida su tras, pero e esencia di e critica cu tin ta un critica cu nos ta tuma na serio.”

Legalidad di producto

Sra. Wever-Croes a pone enfasis tambe riba e punto cu maske e productonan ta drenta Aruba di manera legal, ‘bo no por pretende cu e mesun productonan aki ta wordo obteni di manera legal na Venezuela’. Sinembargo e berdad segun e mandatario ta cu gobierno di Aruba no tin un lista di productonan cu ta ilegal pa wordo exporta for di Venezuela. “Si un pais bisiña pidi bo pa cooperacion e ora ey bo tin di coopera, pasobra nos como pais ora ta papia di bisiña, Venezuela ta un pais cual nos ta comparti hopi lasonan comercial y cultural cu ne.” E mandatario a sigui conta cu riba diabierna gobierno di Aruba lo tene un reunion hunto cu autoridadnan Venezolano na Aruba mes unda lo sinta hunto pa asina por trece un fin na e discusionnan aki. “Cual ta e productonan, a base di kico nan ta wordo considera prohibi, a base di kico ta considera cu Aruba a viola un palabracion por medio di importa esakinan. E ta pa tin claridad riba dje.”

E palabracionnan aki lo tambe encera cu lo mester considera y percura pa esnan cu si kier importa di manera legal por haci esaki debidamente. E preocupacion aki a bin pa via di e situacion na Venezuela unda hopi cosnan den exportacion mes no ta cana di e manera cu debe ser. “Nos lo tin cu palabra bon pa asina ambos interes di Aruba y di Venezuela wordo sirbi cu cualkier acuerdo cu tuma luga.”

Lo subi control na frontera

Mandatario di husticia di su banda a subraya cu e relacionnan cu tin entre Aruba y Venezuela ta algo cu lo mester wordo salvaguardia. Por ehempel en caso cu situacion di crimen organisa of cualkier situacion na Aruba empeora, asina Aruba no lo perde e bon relacion en caso cu mester bati porta di Venezuela pa cooperacion of ayudo.

“Miho bo tin bon bisiña cu bisiña leu”. Ademas sr. Bikker a anuncia cu e control riba fronteranan lo bay wordo aumenta. Segun e mandatario e indice di criminalidad cu ta wordo cometi pa personanan cu ta drenta nos costanan ta hisando. Particularmente esnan cu ta bin pa cometi crimen y cu ta baha na awa despues. “E indice pa hopi aña ta na un nivel alarmante pero actualmente e ta yegando na nivelnan hopi mas preocupante.”

Pa asina por alivia e situacion aki, e mandatario a splica cu el a sinta hunto cu Kustwacht y surveillance di Cuerpo Policial pa asina drecha e radar cu pa basta tempo ta conoci cu tin algun ‘blind spot’. “Nos lo zorg pa tur e buraconan wordo cubri den e radar.”