Redaccion di Bon Dia Aruba a tuma nota di e propaganda di gobierno encuanto e campaña contra coronavirus, cu un aviso hopi sugestivo cu posiblemente tin otro efecto cu loke tabata e intencion originalmente. Riba e imagen, cu por aprecia aki banda, por mira algun paseante riba Linear Park disfrutando di un di e poco actividadnan sano cu ta permiti actualmente, esta dal un bon cana den aire liber. E imagen ta sugeri cu nan ta cana den un cunucu di flor cora cu ta simbolisa, nos ta supone, e coronavirus.
Nos no ta comprende e mensahe, y hunto cu nos hopi hende mas. Pa cuminsa e ta duna un imagen totalmente troci di realidad unda e virus aki, y ningun otro, ta existi den tal abundancia, y no mester di esey tampoco pa ta efectivo. Manera presenta awor, ta surgi e pregunta pakico tin distanciamento social anto, si e virus ta tur caminda y di e forma aki. Seguidamente lo mester saca e conclusion cu lo ta recomendable pa gobierno prohibi canamento o otro actividad di ehercicio fisico, si esaki ta representa e realidad den cual nos ta biba? Pues tambe e pregunta: Nos por sigui cana, of no? Nos por recrea of no den aire liber, of no?
Tambe ta surgi e pregunta, cu si hasta den aire liber e virus ta abunda di e manera aki, ta con mester ta anto den un tienda o supermercado? Di tur e cosnan cu nos ta lesa, nos por conclui cu e virus, cu no ta un organismo bibo sino un tipo di proteina cu ta plama o desintegra bao cierto condicion, y no ta un peligro mas unavez cu esey sucede. Den aire liber y sigur cue biento fuerte y carga cu salo di nos clima, probablemente e virus tin poco tempo prome cu e desintegra. Ta pesey cu na practicamente tur pais, Aruba inclui, no a prohibi canamento den aire liber, ni ehercicio fisico den aire liber, al contrario. Cu e ‘misser’ aki gobierno ta sugeri lo contrario di loke ta nan propio maneho y ta sembra duda unda absolutamente esey no tabata necesario.
Ta di spera cu e equipo di informacion lo sa di coregi e publicacion aki, no pa su intencion di (sigui) adverti contra e peligronan di contagio, pero si pa e imagen exagera cu ta creando cu esaki y e duda riba ehericio fisico den aire liber.
