Gobierno mester restructura cuido di adulto mayor pa por carga esaki financieramente

Ayera mainta durante un conferencia di prensa minister di Transporte, Integridad, Naturalesa y Asuntonan di Adulto Mayor demisionario, Ursell Arends, hunto cu director di Directie Ouderen Zaken, Desiree Helder, a presenta un resumen di e rapport Inrichting Verpleging en Verzorging (Ouderenzorg) op Aruba. E rapport aki ta contene un calculacion pa loke ta costo di cuido pa adultonan mayor pa 2025-2040.

Minister Arends a splica cu ya caba for di juli 2024 ta trahando riba e rapport aki y e conseho a ser prepara door di AAG Financial Services di Hulanda den cual nan ta pone e costo di cuido pa adulto mayor di 2025 te cu 2040 den perspectiva.

El a indica cu e aña aki den presupuesto 2025 tin poco menos cu 30 miyon florin aloca pa cuido di adulto mayor. El a menciona cu segun e conseho di AAG, pa duna cuido pa tur e adultonan mayor den comunidad cu mester di esaki e a lo mester tin e aña un total di 103 miyon florin aloca den presupuesto pa duna e cuido di calidad, pagabel y accesibel na adultonan mayor.

Segun el a indica e rapport a ser presenta na Conseho di Minister y ta spera cu dentro di poco esaki tambe por ser presenta na Parlamento di Aruba pa asina e parlamentarionan tambe tene na cuenta cu esaki ora di bay trata presupuesto di e aña aki, pero tambe presupuestonan cu ta sigui, pa aloca e fondonan necesario pa por brinda e cuido di calidad na e adultonan mayor.

Desiree Herlder, Directora Directie Ouderen Zaken, a presenta un resumen di e rapport cu ta trata costo di cuido di adultonan mayor. El a splica den e rapport aki no solamente a wak e costonan actual, pero tambe a haci proyeccionnan pa 2040.

Helder a indica cu e punto di salida di e investigacion y e rapport aki ta cu gobierno tin e deber di percura pa e calidad di cuido di adulto mayor ta optimal. Y no solamente esey, pero cu e ta pagabel y accesibel tambe pa tur.

El a splica cu actualmente 18.9% di poblacion di Aruba tin 65 aña of mas, cual ta casi 1 di cada 5 persona; 13.3% di esaki tin por lo menos un limitacion, sea ta di bista, movecion of oido; 10% di nan mester di ayudo of cuido pa nan mes, cuido personal of cuido na cas; 5.1% ta den mal estado di salud; y 2.4% actualmente ta den un cas di cuido.

Banda di esaki, el a menciona, tin un lista di espera pa SABA di 150 persona cu wardando riba un luga pa ser interna den SABA.

Helder a sigui splica cu e calculacion aki ta riba tres diferente area. E prome ta cu a wak e cantidad di persona cu mester di cuido actualmente y a wak no solamente e cantidad actual pero a tuma un proyeccion te cu 2040 pa wak den futuro cercano cuanto adulto mayor lo mester di cuido na Aruba.

Di dos area cu a wak ta e necesidad di cuido pasobra no tur hende mester e mesun cuido, e mesun frecuencia y intensidad di cuido. Den esaki a wak ki tipo di cuido e personanan mester y ki tipo di specialidad mester pa duna e cuido aki.

E di tres area cu a wak ta e costo di personal cu mester tin pa por duna e cuido adecua. Tambe a tene cuenta cu e costo di vivienda y di inventario, esaki ta inclui camanan adecua, material adecua pa por lanta hende for di e cama etc., pa por yuda e adulto mayor lo miho posibel.

Pa loke ta e proyeccionnan, Helder a indica cu entre 2025 y 2040 a wak cu e cantidad di personanan cu lo mester di cuido ta crece substancialmente. Pa e aña aki 2,825 adulto mayor mester di cuido y si wak e proyeccion pa 2040 e ta casi dobel, 5,276 adulto mayor cu lo mester di cuido tanto na cas como tambe den cas di cuido.

El a splica cu na momento cu a wak ki tipo di cuido e adulto mayor mester y nan a traha un pakete di seis diferente categoria di tipo di cuido. Categoria uno te cu tres ta e cuido cu e adulto mayor mester na cas y ta varia di un cuido di promedio di un ora pa casi dos ora pa dia. Categoria di cuido cuater te cu seis ta e cuido pa adultonan mayor interna den cas di cuido mes, cu tin diferente limitacion of enfermedad, por demencia of cu ta na cama no por move. E cantidad di ora promedio di cuido pa e categorianan aki ta varia di 3.8 ora pa dia te cu casi cinco pa ora pa dia.

Helder a remarca cu ora cu a calcula hunto cu AAG e cantidad di personanan cu lo mester di cuido, a parti esaki den esnan cu lo mester cuido na cas y esnan cu lo mester cuido den un institucion, y segun e proyeccion e cantidad di adultonan mayor cu lo mester cuido den un cas di cuido lo tin e aumento mas grandi. E tipo di cuido aki ta casi tres biaha mas compara cu awor, locual ta haci cu e costo ta bay subi substancialmente.

Pa loke ta e costo, el a splica cu pa e aña aki lo tin mester di casi 103 miyon florin pa cubri full e cuido di adulto mayor tanto na cas como den cas di cuido. El a sigui splica cu si wak e particion di e costo na cas y e costo den cas di cuido, ta wak cu e costo di cuido na cas ta 44.3 miyon y 58.6 miyon pa e cuido na cas di cuido.

El a agrega cu e cantidad di personanan ta varia hopi. Esunnan cu mester di cuido na nan propio cas ta 2,040 persona y esunnan cu mester cuido na cas di cuido ta solamente 610. Esaki ta nifica cu e costo na un cas di cuido ta substancialmente hopi mas caro cu si e cuido ta ser duna na e cas di persona mes.

Pa loke ta e proyeccionnan di costo pa 2040, e ta yega casi na 394 miyon cu lo mester tin disponibel pa e cuido pa adulto mayor ta adecua. Un crecemento di sigur tres biaha mas di locual cu lo mester tin disponibel awor.

Pa e motibo aki a traha dos scenario den cual a calcula e costo total di e cuido si logra pa baha e cantidad di persona cu mester cuido den un cas di cuido cu 50% of 75%. E resultadonan di e scenarionan aki a indica claramente cu un reduccion di e cantidad di personanan cu mester cuido den un cas di cuido lo significa un reduccion substancial di e costo total di cuido. Un reduccion di 75% di e cantidad di personanan cu mester di cuido den un cas di cuido lo nifica un reduccion di costo di 47% pa 2040.

Por ultimo, Helder a indica cu conclusion di e rapport aki ta indica cu gobierno mester restructura e cuido di adulto mayor lo mas posibel pa duna esaki na cas, en bes di un cas di cuido, pero alabes mester sigura cu e cuido na cas tambe ta adecuado, accesibel y di bon calidad. Solamente asina por haci cu e costonan por ser carga y cu e ta financieramente sostenibel pa cuido pa adultonan mayor