Despues di un periodo largo di negociacion, caminda te hasta e trahadonan a bay den accion varios biaha, finalmente a keda firma un contracto colectivo (CAO), entre sindicato FTA y directiva di Stichting voor Verstandelijk Gehandicapten Aruba (SVGA). E CAO aki tin un componente singular compara cu otro CAO anterior. E tin di haci cu e reconocimento di e concubino den e CAO nobo aki.

Presidente di FTA, Hubert Dirksz a garantisa cu pa medio di e firma di e CAO di tres aña aki lo trece trankilidad laboral den e fundacion aki. Pero tambe e trahadonan a bay padilanti.

Subsidio.
SVGA ta un fundacion cu ta mantene su mes a base di subsidio di gobierno. Dirksz tabata prudente pa no papia riba e beneficio primario di aumento di salario, sino secundario. E sindicalista a bisa cu awendia e CAO no ta wordo concentra riba e parti financiero so, pero tambe riba otro beneficionan.

El a bisa cu e parti di salario ta segun structura salarial cu ta den e CAO poni pa su cumplimento. Pero SVGA ta un fundacion cu ta depende shen porciento di subsidio di gobierno. Nan ta spera cu pronto lo tin e problema di pago di subsidio regla na tempo tras di lomba. E sindicalista ta reconoce cu e aspecto aki ta stroba no solamente e trahadonan y nan sindicato, pero tambe e directiva di e fundacion pa por funciona.

Beneficionan.
Segun e sindicalista, e ta un CAO basta amplio cu ta concentra riba e parti financiero y di beneficionan.

Un beneficio cu e empleadonan di SVGA a haya ta cu na momento cu un di nan ta haci aña, ta haya beneficio extra. Algo masha excepcional den e CAO aki ta cu no solamente tin beneficionan pa e parehanan, pero aworaki ta wordo reconoci tambe pa e concubino. Kier men si bo ta biba cu un pareha, bo no mester ta casa, sino cu bo ta biba hunto, y tambe bo ta haya e derecho manera un pareha reconoci oficialmente.

Otro beneficio cu sindicato a logra den e negociacion di e CAO aki tin di haci cu e hubileo uitkeuring tambe a aumenta, ora cu e empleado ta cumpli 45 aña di servicio. E hubilario ta haya 100% di su salario pa luna como regalo.

Un parti importante den e CAO aki, cu a keda firma diamars atardi na oficina di SVGA na Piedra Plat, tin di haci cu e relacion tanto di e sindicato y e compania.

Fundacion SVGA.
Presidente di e directiva di SVGA, Debora Alexander, a bisa cu un parti importante pa nan ta cu e concubino ta wordo reconoci den e CAO como partner den un relacion. E hecho aki el a considera importante, considerando e status di tur persona.

Igualmente e CAO aki ta importante pa e directiva di SVGA, pa asina nan empleadonan por sigui haci nan trabou cu trankilidad. “Mi ta kere cu tur trahado kier ta sigur den nan posicion,” el a bisa.

Di su banda, directora di SVGA, Els van Homelen a bisa cu e subsidio cu nan ta haya como fundacion nan ta depende full di gobierno. “Esey kiermen cu pa nos por duna na nos trahadonan un salario cu nan merece, nos mester di placa di gobierno,” el a bisa.

Te ainda tin cos pendiente cu nan personal tin derecho riba cierto salario prome cu 2017. El a trece e punto aki dilanti, pasobra nan ta considera importante pa por cumpli debidamente cu e CAO aki. P’esey nan ta considera ‘hopi nechi’ si gobierno lo por cumpli cu e pago di subsidio, manera semper tabata e derecho di nan trahadonan.