Gobierno mes ta proba… Cu mester supervision…

E tema di supervision financiero ta keda requeri nos atencion, a pesar cu e por parce un disco raya’. E ta un asunto importante. E impresion ta cu gobierno ta hungando e wega di argumenta cu gobierno mes a bay di acuerdo cu e ley di Reino, pero cu ‘lamentablemente parlamento no kier’. Naturalmente cu lo tin hopi cu ta pensa: “Ma ta ken ta manda den e partido ey?” Pasobra normalmente ta e promer team, e ‘A-team’ di cualkier gobierno na Aruba, esnan den conseho di ministro, tin ultimo palabra.

Sin embargo, tin momento cu ta conveni pa de repente corda cu segun teoria acepta internacionalmente, ta parlamento ta e organo mas halto den un sistema gubernamental democratico. Den pasado nos a yega di experimenta e tipo di situacion aki tambe, pero semper esnan cu ta dicidi cu e B-team mag ta na palabra, ta e A-team. Den e dianan aki nos ta haya un repiticion di e fenomeno aki. Den e disputa cu Hulanda, si nos ta bay di acuerdo cu un ley di Reino di supervision financiero of no, gobierno ta maneha e argumento cu ta parlamento den su mayoria no kier un ley di Reino. Pa cuminza mester bisa cu e mayoria ey ta principalmente e banda di e mesun gobierno, cu parlamentario cu ta para firme contra e intentonan Hulandes cu supuestamente ta hinca nos atrobe den colonialismo y sclavitud, manera nan expresionnan beligerante ta duna di conoce. Riba su mes nos por comprende cu tin un sentimento anti-Hulanda asina fuerte den e banki gubernamental den parlamento. Esey lo por ta un indicacion cu nan ta desvia claramente di e opinion di nan propio Promer Ministro, cu a bay di acuerdo caba cu tur cos cu a negocia den ultimo añanan cu Hulanda. Nos a ripara algo di e diferencia di opinion aki? No, pasobra e promer mandatario por bisa, pa consumo na Hulanda cu e ‘lamentablemente no por haci nada’ pasobra parlamento den mayoria lo ta contra, pero aki na Aruba e no lo por convence ningun persona cu common sense cu e ta diferencia di opinion cu su parlamentarionan. Ta parce mas un wega bon hunga, haciendo oportunamente uso di e teoria, cu na Hulanda tin algun contenido, cu parlamento ta e organo mas halto.

Di tur manera, si e situacion keda asina, nos mester observa anto cu den e negociacion cu Hulanda e espacio pa maniobra pa gobierno di Aruba ta keda bastante limita. No ta posible acepta un solucion otro cu nenga redondamente acepta e ley di Reino, y acepta e consecuencianan financiero di e decision ey. Si esey ta e caso, anto no ta mira pakico ta keda negocia, pasobra no tin un solucion intermedio cu por satisface tur dos banda. Y ademas, si gobierno logra bin back cas cu un solucion negocia, atrobe mester bay parlamento pa ‘convence’ e backbenchernan di partido cu nan mester ta pro un solucion cu nan no tabata kier, o ta manda nan aproba, y punto?

Tur esaki ta trece nos atrobe na e sospecha cu no ta nada mas cu un wega bon palabra, loke riba su mes no ta nada straño, ta pesey nan ta hunto. Pero e ora ta surgi e pregunta ta kico ta e resultado final? Kico realmente ta e opcionnan cu tin actualmente? Uno, ta acepta e ley di Reino, cu tin mesun contenido cu esun di Aruba, y nos ta scapa Aruba un gasto miyonario innecesario pa varios decada. Dos, ta nenga e ley di Reino, nos ta bay paga mas pa nos prestamonan cu Hulanda y… nos a keda toch cu supervision financiero…? O ta crea e impresion cu si nos paga mas, no tin supervision mas? Soñar no cuesta…,, o tin un plan aki bao? Laga nos pensa un tiki mas leu. Si opta pa keda cu e ley di Aruba, ta keda existi e posbilidad pa parlamento – autonomo o independiente – cambia e ley manera e partido lo tin gana di cambie. Al fin y al cabo, nan no kier supervision mas, toch? Ademas, elimina e ley ta percura pa e obra aki di e rival grandi ta keda kita for di caminda… Por ta cu ta esey ta e obhetivo? Di ‘elimina’ e ley di supervision, mientras no lo tin ley di Reino, pasobra e mester ta uno di consenso, cu no t’ey? Den teoria esaki ta posible, pero den practica no, y pa un motibo masha simple. Nos ta biba den un parti di un nacion mas grandi cu nos, cu yama Reino Hulandes. Bo no por kere cu bo ta djis haci algo manera bo ta haya ta bon, sin consecuencia, pasobra bo no ta e autoridad mas halto cu ta vigila interes di pueblo. Manera indica den un anterior Editorial, haci esey no ta posible pasobra no ta pornada Gobernador ta representante di Rey, y si e no firma, bo no tin ley… Anto cu esey, e caminda pa elimina e ley di Aruba ta cera…

Ta di spera cu sano huicio prevalece, y ta evita un conflicto serio cu Hulanda, pasobra esey ta loke ta conveni gran mayoria di pueblo. Finalmente, no ta mayoria di parlamento ta mas relevante, pa mas ‘independiente’ o ’autonomo’ cu nan por kere cu nan ta. Si un gobierno kier ta asina iresponsable pa risca cu pueblo ta bay paga cientos di miyones mas, anto esey ta e mihor prueba cu bo no ta cla pa maneha bo mes asuntonan financiero. Ta nan mes ta hustifica anto cu mester di supervision.