Gobierno di Merca a designa regimen di Nicolas Maduro como patrocinador estatal di terorismo, y lo presenta cargo contra lider di e dictadura Chavista, den un move transcendental cu lo marca un punto mas abao den e relacion entre Merca y e estado socialista den decaida.
E designacion ta pone Chavismo den compania di cuatro otro pais, Corea di Norte, Iran, Sudan y Siria, cu a “brinda apoyo na repetido ocasion na acto di terorismo internacional” y lo permiti gobierno di Estadonan Uni implementa sancionnan mas paralizante contra e pais.
Tambe ta anticipa cu e fiscalnan di Departamento di Husticia di Merca lo denuncia e acusacionnan penal contra Maduro y e principal lidernan di su gobierno, segun e fuentena consulta. No ta cla ainda di cual delito specifico ta acusa nan, pero e fuentenan ta bisa cu nan tabata relaciona cu e extenso existencia di narcotrafico den e pais, cu colaboracion y participacion di e cupula gubernamental.
Fiscal di sur di New York Geoffrey Berman a anuncia e designacion y e cargonan den un conferencia de prensa ayera mainta.
Nicolas Maduro, Diosdado Cabello y 12 otro figura prominente di e dictadura Chavista, entre nan ministro di Defensa Padrino Lopez, Hugo Carvajal, Cliver Alcala, presidente di Tribunal Supremo, e asesino condena Maikel Moreno y Tarek El Aissami, a keda acusa di narcotrafico y labamento di placa.
Merca a ofrece 15 miyon dollar di recompensa pa informacion cu ta conduci na aresto di Nicolas Maduro; 10 miyon pa Diosdado Cabello, Hugo Carvajal, Cliver Alcala y Tarek El Aissami pa trafico internacional di narcotico.
Berman a manifesta cu: “E lidernan di FARC tabata ricibi arma di alto caliber di Venezuela. Esaki ta Maduro, e lider di cartel de los Soles.“ Y a agrega:” E ta awor mes na Venezuela, pero nos lo haci lo posible pa e por yega cerca husticia pafor di Venezuela.”
