Gobierno MEP – POR ta escogencia logico

Den e consultanan cu Gobernador a tene cu varios entidad, tanto partidonan politico como gremio y sindicato, Conseho Social Economico, Conseho consultativo, entre otro, a trece e sugerencia dilanti, no di tur, di sondea e posibilidad di un gabinete entre e dos partidonan grandi. Esey ta parce nos un ehercicio inutil, cu no merece ningun consideracion. Y pakico no? Pasobra na nos parecer no tin un situacion asina dificil, cu ta hustifica un gabinete di e indole ey. Ademas e mero hecho cu e dos partidonan tin mes tanto asiento den parlamento ta haci cu e representacion den e gabinete ta bira un problema. Ken ta bay suministra e prome ministro? Con ta bay tuma decision, y principalmente esunnan dificil y controversial?  Y con ta bay yega na acuerdo tocante e medidanan cu mester tuma pa coregi e rumbo cu situacion financiero gubernamental ta aden awe? Mas ainda si esun a causa esaki y e otro tin ocho aña ta critica.

Aunke un base di 11 voto no ta nada tremendo, pero un plan di gobernacion bon detaya y transparente ta e manera pa tuma rienda di nos pais. Den e sentido aki por considera un gabinete cu RED tambe aden, cu por conta cu 12 voto den parlamento, cu por duna un poco mas forsa na e conhunto. Esaki naturalmente por trece complicacion, tanto den plan di gobierno como den repartimento di cartera, pero por tin su bentaha tambe.

Importante ta tambe considera kico e entidadnan estatal manera SVb, AZV y APFA a trece dilanti na gobernador y cu nan a comparti cu prensa. Si nos scucha director di SVb cu atencion, el a argumenta cu e pais no a recupera di e recesion cu a inicia casi un decada pasa, y cu e entradanan di seguro social ainda no ta na e nivel cu e lo ta desea di mira nan, pa enfrenta e problemanan cu ta presenta aki un par di aña. Na otro ocasion el a yega di comenta caba, cu si acaso tabatin aumenta di entrada di prima, esey ta mas bien fruto di cobransa mas efectivo, pero no di crecemento economico. Cu un economia ademas den su tercer aña di recesion actualmente, y cu un proyecto di refineria den un situacion hopi scur, un plan pa reactivacion di nos economia lo bira un punto importante, aunke e tema aki no a bin dilanti den e comentarionan te awor.

E mesun mensahe di SVb, nos ta scucha tambe di director di AZV, riba cual e entidad aki a publica extensamente caba.  Den e caso di AZV ta hunga un papel cu, aunke a tene e gastonan basta bon bao control den ultimo añanan, ta premira cu den e proximo añanan lo tin un aumento di gasto considerabel, pa motibo di e aglomeracion di proyecto costoso, manera expansion di hospital y e proyecto oncologico na Imsan, entre otro. Tambe embeyecemento di e poblacion ta keda pusha den direccion di mas gasto, pa e simpel presencia di mas ciudadano di edad, cu relativamente mas gasto medico pa persona, algo universal di cual nos no ta scapa tampoco. E remedi lo mester bin di banda di mas entrada, sigur si no ta considera ningun medida pa limita gasto, manera un aportacion individual di e beneficiarionan (eigen bijdrage). E escogencia lo no ta facil, y no tin tanto opcion. Por ehemplo, aumenta aporte di gobierno for di presupuesto no ta recomendabel ni factibel, mirando e necesidad pa autorisa pa yega na un surplus, segun e ley di CAft cu ta exigi esaki pa 2018. Ademas, aporta di presupuesto tambe mester sucede cu placa cu ta bin di den economia, di cualkier tipo di impuesto, finalmente di cartera di ciudadano individual y di empresa, loke tambe ta afecta un economia cu ta bastante fragil ainda. Aumento di BAZV tambe ta dificil, pasobra aumenta peso riba un economia cu no ta crece ta sumamente peligroso, y por causa cu  esaki ta empeora e situacion economico na luga di drecha. Aumenta prima, via un caminda un tiki diferente, lo tin e mesun efecto riba economia manera e BAZV. Scoge finalmente entre un man yen di opcion dificil y impopular ta representa di berdad un dilema grandi, cu lo no ta facil pa maneha pa ningun coalicion.

Den e caso di SVb e situacion lo ta menos dramatico, ya cu e medidanan tuma den añanan anterior, entre otro aumento di prima, cambio di edad di pension pa 65 aña, a trece cierto garantia cu e fondo di AOV no ta core peligro directo, aunke cu, manera señala caba, ta importante pa crecemento economico trece mas entrada di prima aden. Esey ta significa cu cada cambio cu ta desea di haci, den edad di pension por ehemplo, mester ta neutral pa loke ta entrada y gasto. Esey ta posibel cu un areglo flexibel, unda por bay cu pension prome, pero cu un reduccion di e suma di pension corespondiente.  Den e sentido aki ta previsibel cu e deliberacionnan tocante fondonan social y medico sigur lo haya bastante atencion den e consulta entre e partidonan.