Minister di Salubridad, Dangui Oduber, y Prome Minister Evelyn Wever-Croes durante conferencia di prensa a elabora riba e tema di COVID-19. E tema aki tin e preocupacion di Gobierno y tambe tin e atencion completo y constante.
Prome Minister a anuncia cu Gabinete Wever-Croes lo introduci un ‘economic and innovation stimulus package’ pa absolve e efectonan economico di Corona Virus.
Segun e comunicado cu nos a ricibi ta indica cu Gobierno di Aruba a eleva e nivel di preparacion pa Corona Virus na un nivel di crisis cual ta awo den man di Gobierno. Prome Minister a enfatisa cu esaki no ta pasobra cu tin caso di Corona Virus na Aruba, esaki ta pa asina Gobierno por prepara miho posibel como tambe pa sigura cu tin fondonan disponibel di e fondo di crisis pa asina atende cu esaki. Gobierno di Aruba ta trahando riba 3 plan di contingencia:
Salubridad: Esaki ta na encargo di Prome Minister y Minister di Salubridad. Gobierno di Aruba a eleva e nivel di preparacion pa Corona Virus na un nivel di crisis pa asina Gobierno por prepara miho posibel como tambe pa sigura cu tin fondonan disponibel di e fondo di crisis cu Gobierno a establece na 2018, pa asina atende cu esaki.
Turismo: E plan di contigencia aki ta pa compensa den caso si nota un caida di turismo. ATA, APA y AAA, dirigi pa Minister di Salubridad, ta trahando riba diferente scenario y e plan di contigencia pa atende cu e eventualidad si nota cu e cantidad di bishitante baha. ATA tin un fondo di emergencia pa cu esaki.
Economico: E plan di contigencia aki ta cay directamente bou di Minister President, Evelyn Wever-Croes. Si cantidad di turismo baha, esaki por tambe afecta nos economia, hustamente na momento crucial na unda cu Gobierno ta purbando pa rebiba nos economia. Riba proposicion di Prome Minister, Conseho di Minister a tuma e decision diabierna ultimo pa pone mas atencion den inversionnan economico y bin cu e “Economic and Innovation Stimulus Package”. Gobierno kier ofrece ayudo na empresanan chikito y mediano y empleadonan cu haya nan mes den problema financiero door di Corona Virus. E prome fase lo ta pa acelera e solicitudnan di inversionnan cu ya a wordo entrega sin cu e burocracia ta un obstaculo.
Gobierno ta spera asina cu por mantene economia ta draai, particularmente pa sigui duna trabou na esnan cu ta perde trabou. Tambe Gobierno lo establece un fondo economico y di innovacion pa apoya financieramente e empresanan. E cantidad cu lo inverti den e fondo aki ta depende di varios factor. Importante ta pa Presupuesto 2020 cu pronto lo wordo trata den Parlamento, wordo aproba.
Banda di esaki, Gobierno ta solicitando fondonan di organisacionnan internacional cu ta pone fondonan disponibel pa situacionnan asina. Cu e fondo aki y e plan di emergencia cu actualmente ta wordo traha riba dje, Aruba lo ta un di e prome paisnan miho prepara den nos region den e area aki. Esaki ta posibel danki na e hecho cu pa prome biaha den hopi aña, Aruba tin un surplus den nos presupuesto.
