Minister di husticia Andin Bikker (POR) lo bay Hulanda pronto pa reuni entre otro cu ministernan di husticia di Hulanda y Corsou, entre otro riba un prizon nobo.

Basicamente nan lo bay renoba y/of traha un KIA nobo, segun e minister.

El a anuncia e siman aki cu tin renobacion na caminda pa KIA. E ta bisa cu e instituto actual aki no ta optimal y mester di un renobacion. “E mantencion ta laga hopi di desea. Y esunnan cu ta traha eynan ta traha bao circunstancianan hopi dificil.”

Esunnan cu ta deteni tambe ta deteni bao circunstancianan hopi dificil, cual ta algo cu a yega di bini dilanti recientemente, segun e. Gobierno a pone como tarea pa bin cu un instituto di coreccion nobo pasobra e aspecto di coreccion no ta wordo observa practicamente. E mandatario ta bisa cu esaki ta hopi dificil. Y ora cu un persona sali, nan a constata cu hopi ta cay bek den mesun mal caminda. Pasobra e tempo cu nan ta deteni na KIA – practicamente pa via di dificultadnan manera infrastructura – no a yuda nan mehora pa asina haya e caminda drechi bek. Esaki ta un prioridad pa loke ta trata e maneho di preveni y combati criminalidad segun e mandatario.

‘Situacion deplorabel’
Algun dia pasa fraccion POR representa pa Marisol Lopez Tromp y Alan Howell a realisa un bishita di trabao na KIA pa asina wak mas di cerca con KIA ta. Parlamentario Howell a bisa despues cu ta ‘increibel pa wak den kico y con e ciudadanonan di preso y henter personal di KIA ta traha aden’.

Ultimo biaha cu Bon Dia mes a bishita e prizon, nos a nota cu paden como tambe pafo di e edificio tabata den mal estado. Aña pasa delegacion di parlamento di Aruba a biaha pa atende un reunion di Parlatino (Parlamento Latino Americano) na Panama. Lider di fraccion di MEP, Rocco Tjon a laga sa e tempo ey cu e delegacion a atende diferente reunion y tema cu tin di haber cu prizon sostenibel. Parlamento di Aruba a cera acuerdo den Parlatino pa asina percura pa esaki y ta laga sa cu ora ta papia di inversion, no mester tene cuenta unicamente cu aspecto di infrastructura. Locual mester pone hopi atencion na dje tambe segun sr. Tjon ta inversion den personal y cu nan mester tin material adecua pa por eherce e trabao manera debe ser.

Minister di husticia anterior Arthur Dowers (AVP) tambe a expresa hopi biaha cu KIA ta afgekeurd y mester un prizon nobo. Pero cu no a logra cu placa, tampoco ora nan a atende e punto di financiamento na Hulanda.