Un innovacion den gobernacion cu minister di husticia kier bay bin cune pronto ta encera digitalisacion di e proceso di publicacion di cambio di ley y ley nobo, incluyendo e nota di splicacion (Memorie van Toelichting, MvT). Segun e mandatario esaki ta un desaroyo nobo den Caribe. E E-booknan lo ta actualisa continuamente.
Durante un conferencia di prensa ayera mainta e mandatario encarga cu husticia, Andin Bikker (POR) a duna di conoce cu gobierno ta studiando pa algun tempo publica leynan nobo y cambionan di leynan den formato di E-book. Esaki ta inclui e MvT cual famosamente ta dificil pa haya riba internet. Algun di Bon Dia su reporteronan, na momento di kier haya esaki den man mester bay te Directie Wetgeving en Juridische Zaken pa por haya copianan, mirando cu ta dificil pa haya esaki riba internet.
E mandatario a motiva e iniciativa primordialmente cu e preocupacion pa nos medio ambiente, mirando cu si cuminsa haci esaki ‘bo no tin nodo di print tanto papel’. E mandatario a indica cu alabes ta keda e flexibilidad cu e personanan cu ta haci uzo di esaki por bay print esaki na cas of ordena pa print esaki.
Segun e mandatario esaki ta bira un innovacion grandi cu Aruba lo bin cune, mirando cu no tin mucho legislado rond mundo cu ta haciendo esaki te awo. “Si haci un poco research por mira cu entre otro na Merca y Alemania nan tin esaki. Florida, Texas, Wisconsin y algun pais den Europa manera Alemania ta haciendo esaki, pero pa Caribe, Aruba lo ta un di e poco den mundo cu tambe lo introduci e dimension aki”.
