Minister di Turismo y Salud Publico, Dangui Oduber a anuncia cambio, adaptacion y modernisacion di e proceso pa otorgamento di permisonan pa Horeca, Hotel, Bar & Restaurant.
Ta bay Digitalisa e proceso aki completamente pa asina facilita esaki pa comerciantenan no tin mester di bay diferente departamento mas pa puntra unda permiso por ta pega of ki dia controlnan por tuma lugar.
Si tur cos cana manera ta wordo planea segun Minister Oduber, pa e di tres kwartaal di e aña aki lo por ta cla cu e proceso aki caminda e comerciante por haci su peticion online via un Web Portal. E por track & trace su peticion y ricibi su permiso online. “Cu esaki sigur nos ta bay burocracia, nos ta elimina ‘Red Tape’ y brinda un miho servicio na sigur comerciantenan cu ta haci peticion pa cualkier un di e permisonan cu nos a menciona,” segun Minister Oduber ta splica. Unabes e proceso aki ta cla, e siguiente paso ta pa bay na ‘koppel los’ departamento di Dienstwaar Keur & Hygiene cual ta e departamento encarga pa haci controlnan necesario, conhuntamente cu Polis y tambe Brandweer.
A tuma decision den Ministerraad segun Minister Oduber pa e bira un Sui Generis cu e meta ta pa traha mas eficientemente, trahando cu mas transparencia y mehora clima di haci negoshi na Aruba.
Minister Oduber ta di acuerdo cu ya caba tin limitacion di cantidad di tereno cu tin disponibel y ta keda para riba punto cu no ta habri pa desaroyo di hotel grandi mas. Mester tene cuenta cu capacidad di carga pa proximo añanan. Gobierno a bisa semper cu no por paralisa of stop desaroyo completamente p’esey e maneho cu nan kier hiba ta pa sigui cu e desaroyo pero cu hotelnan mas chikito estilo Boutique di calidad sumamente halto cu tin un impacto hopi minimo riba tur aspecto cu ta tene cuenta cune.
‘Miho control y supervision’
Gobierno kier yega na un ‘Data Intelligence Driven Island’ caminda tin tur data disponibel di no solamente tur esnan cu tin permiso di Restaurant, All Inclusive y Hotel, pero tambe di otro acomodacionnan. Cu esaki ta ehecutando e puntonan di accion di un rapport cu a wordo traha algun aña atras por medio di Aruba Tourism Authority cu yama ‘Mira pa Futuro’ y tambe ta ehecutando loke ta para den e Landspakket. “Nos kier trek recht tur esnan cu a opera sin permiso pa e ultimo añanan cu no a cumpli pa asina tur hende cumpli cu tur rekisito stipula den cualkier permiso otorga pa miho control y supervision riba e cantidad di permiso entrega,” segun Minister Oduber.
E LIM [Landsverordening Instelling Ministerie] di Ministerio di Turismo y Salud ta esun encarga cu otorgacion di diferente permiso pa loke ta trata horeca y hotel. E permisonan cu e ministerio aki ta duna entre otro ta Hotel Vergunning, All-Inclusive Vergunning, Koffie Huis Verginning y otronan. Di algun tempo caba den e prome Gabinete a haci diferente ehercicio pa wak kico por wordo haci pa mehora e servicio cu ta wordo duna na clientenan di gobierno, na comerciantenan, ora nan ta haci nan peticion pa diferente permiso. Kico por modernisa, cambia y adapta pa tin un miho y mas rapido servicio cu mas eficiencia.
Un di e Red Tapes grandi segun Minister Oduber ta e manera con e proceso ta hinca den otro den e momentonan aki pues p’esey mester cuminsa tuma e decisionnan y accionnan necesario. “Actualmente tur proceso cu ta wordo encamina pa haya cualkier un di e permisonan aki ta bay manual, mester yena un formulario, control mester wordo haci pa diferente dienstnan ora e advies ta positivo. E ora un establecimento ta bin na remarca pa un di e permisonan aki,” e mandatario ta splica.
Ora cu bo haya un Hotel Vergunning, bo ta haya un permiso pa opera cu X cantidad di camber, pero den practica ta bisto cu tin biaha hotelnan tin mas camber di loke nan tin permiso p’e segun e mandatario a trece dilanti. Y ta p’esey tambe Gobierno ta bay over na ‘koppel los’ e Dienstwaar Keur & Hygiene pa asina por cumpli cu tur punto menciona.
Minister Oduber: “Pero primordialmente percura pa tin un miho clima di inversion y elimina burocracia y red tape. Nos ta spera e proceso sigui cana manera e ta bin canando pa asina e di tres of di cuater kwartaal nos por lansa esaki oficialmente.” E mandatario ta sigui splica cu na momento cu lansa esaki por medio di e Web Portal, lo tin un Live Chat y un Help Desk pa asisti tur e comerciantenan cu ta haci peticion y kier track & trace un di nan permisonan.
