E caso di e compania di telecomunicacion MIO cu nan licencia di operacion a wordo revoca, no a caba ainda. Gobierno ta bay cuminsa cu e pasonan legal pa cuminsa cobra un suma di 15 miyon florin cu MIO a keda debe na pais Aruba.

“Nos lo cuminsa un caso basta amplio. Si nos mester yega te Merca, nos lo haci esey”, e minister di Economia, Richard Arends ta bisa Bon  Dia Aruba

El a compronde cu e compania aki a keda debe hopi instancia placa. Ademas varios empleado a keda sin trabou, locual tin su impacto riba nivel di desempleo y socialmente.  Ya cu nan a keda debe entre otro na  nan  trahadonan.

“Den e caso specifico di MIO ta un caso cu no tabatin miras pa yega na un solucion.” Tin diferente opinion rond di e caso aki, entre nan e suma cu mester cobra pa un compania di telecomunicacion chikito, mediano of grandi  por opera na Aruba.

Den e caso aki, minister Arends ta haya cu ta existi un decreto cu ta stipula un suma pa opera cu celular cu gobierno mester cobra. E ta haya cu como minister e tin obligacion di respeta ley y percura pa e ley wordo manteni.

El a declara cu esaki tabata e caso cu MIO, caminda nan a discuti cu e suma tabata mucho halto pa nan. E compania a bay corte contra gobierno varios biaha y semper e veredictonan a sali na fabor di gobierno.

Buskeda di solucion
Minister Arends a laga sa cu personalmente e tabata envolvi pa purba yega na un solucion. “Pero MIO a indica cu no tabata interesa di haci e pago ey.” Minister Arends a elogia cu nos sistema legal ta uno fuerte y bon hinca den otro pasobra practicamente e directornan y doñonan di  MIO a disparce di Aruba. Nan a laga e trahadonan desampara, e ta bisa

Mirando cu gobierno no por a yega na un acuerdo mes cu e compania aki, e mandatario a laga sa e director cu como tarea di gobierno, nan ta  duna un oportunidad pa e trahadonan busca nan derecho. Esaki a sosode durante e ultimo dos siman cu nan a switch off  e operacion di MIO.  Pues e ta haya cu como tarea di gobierno nan a percura pa tin un transicion pa e clientenan y e trahadonan mas suave posibel.

E minister ta bisa cu e parti di e trahadonan ta hopi dificil. P’esey Mediador di Gobierno mester cay aden pa guia nan den e proceso di cobra nan cesantia y informa nan kico ta nan derechonan, etc..