Prome Minister Evelyn Wever-Croes (MEP) a duna di conoce cu den cuadro di e-government, pues digitalisacion di proceduranan gubernamental, ta bay tin un enfoke mas amplio riba transparencia y suministro di data cu por publica riba dje. E prome ministerio cu ta cuminsa cu esaki ta husticia, ‘particularmente cu e parti di migracion’.
“Nos a ripara cu ora bo tin cu maneha e tema di migracion particularmente, bo tin cu maneha esaki na un forma responsabel. Pa esaki bo tin cu tin datos.”, e mandatario a expresa, bisando cu el a yega poco laat na e conferencia di prensa pa via di un reunion cu tabatin riba e mesun tema aki. Pronto lo bay cuminsa colecta data den e departamentonan encarga cu migracion, pa asina por publica riba e informacion aki.
Claramente esaki no lo inclui datonan individual of personal, si no cu lo duna bista, por ehempel, cuanto porcentahe di cierto nacionalidad ta pidi un extension turistico, of cuanto persona di cierto nacionalidad ta pidi un permiso di estadia pa cada aña. Esaki, pa clarifica, ta informacion cu tin disponibel caba, pero cu mester pidi pe expres. Asina den pasado por nota cu directora di departamento migratorio Dimas a yega di duna bista riba cuanto cliente nan tin den un aña pa tal nacionalidad. Pues den futuro lo haci esaki sin mester pidi pa e informacion.
“Esaki ta bay yuda nos maneha y tambe den suministra informacion. Mi tin cu bisa cu esey ta un di e metanan principal di e-government. Mi ta contento pa mira cu den cadena hudicial nos ta bay cuminsa y cu pronto nos lo por tin prome resultado.”
Cada minister y departamento tin palabracion ora di duna informacion politicamente sensitivo
Banda di esaki, den pasado tabatin situacionnan den cual prensa ta busca cierto informacion na director of hefe di departamento, riba cual e director of hefe ta reacciona bisando cu e no tin mag di duna comentario sea en general of sea riba e topico specifico. Prome Minister a mustra riba e protocol cu Gabinete Wever-Croes tin cual ta encera cu ta keda na cada minister pa palabra cu nan departamento ki informacion por duna na prensa of publico. El a menciona cu pa cierto topiconan cu por ta politicamente sensibel, e mes como mandatario tin palabracion cu su departamentonan cu ta miho pa palabra si ta e hefe of e minister mes ta duna comentario riba nan.
Pues asina si e departamento no por duna informacion, ta keda na e minister pa contesta cierto pregunta, tanten cu e no ta informacion di casonan individual, cual naturalmente den mayoria caso gobierno no por duna. “Ta importante pa nos ta transparente y duna informacion. Mi ta kere tin varios stap den e trapi pa determina con y ken ta duna informacion. En general ta e departamento, si ta cosnan individual ni departamento ni minister, si ta asuntonan sensitivo sea e departamento of e minister, pero na fin di dia e minister.”
