Miembro di fraccion di AVP den parlamento, Mike de Meza, a mustra cu ta di lamenta cu pa motibonan di tensionnan internacional a pone cu a trece un slowdown den e proceso di rehabilitacion di e refineria na San Nicolas.
Na mes momento e ex Minister di Energia a mustra di tambe ta di lamenta e hecho cu e gobierno actual ningun momento a tuma contacto cu Citgo for di un principio cu nan a asumi responsabilidad den gobernacion, pero awor ta Citgo a bin tuma contacto cu gobierno pa informa di e desaroyo cu a surgi den e proceso di rehabilitacion di e refineria. “Gobierno a warda ta na e momentonan aki pa Citgo a tuma contacto cu nan y esey ta di lamenta ya cu na momento cu bo drenta den gobierno, esakinan ta proyectonan grandi, proyectonan riba nivel internacional, caminda t deal cu multinationals, no tin wega pa consumo politico local.
E cosnan aki ta cosnan serio y nos a spera cu e gobierno actual lo a tuma contacto cu Citgo for di prome dia cu nan a drenta den gobierno y nos por a scucha prome minister bisa constantemente cu e no ta sinta cu nan y lo manda un carta pa nan. Inmediatamente ora cu bo drenta gobierno, bo ta tuma contacto cu bo partnernan strategico, sinta na mesa cu nan, delibera cu nan, wak kico ta pasando. Por a scucha den medionan di comunicacion di oficialnan di Citgo cu a invita gobierno pa bin hunto cu nan pa nan pone cabes hunto y papia cu gobierno di Merca y mustra nan cu aki ta papia di un isla di Reino Hulandes, un isla cu tin un refineria, un isla cu ta bay rehabilita e refineria y esaki no tin nada di haber cu otro cosnan. Kiermen aki den tambe tin espacio pa gobierno di Aruba tuma contacto cu gobernantenan Mericano, cu abogadonan Mericano, y interveni den esaki pa sali na interes di pais Aruba.
Tur hende por corda cu na momento cu AVP a drenta gobierno na 2009, tabatin un refineria cera y nos a drenta den avion inmediatamente bishitando entre otro Valero constantemente, den negociacionnan directo cu presidente di e compania aki y na mes momento nos tabata bishita Petrobras, PetroChina, Ecopetrol, refinerianan grandi na Mexico, Colombia, Trinidad, Saudi Arabia y tambe na Hulanda y Europa y ta un trabou cu mester a ser tuma na serio y nos a traha duro pa esey. Nos a logra na entrega a trabou ya cu Citgo ta wordo reconoci te dia di awe como un di e refinerianan cu mas ganashi ta dunando na Merca, e tin un record historico sumamente positivo, e ta un cooperacion grandi y ta berdad e ta bay bou di PDVSA, Venezuela Holding, y PDVSA ta e aandeelhouder pero e ta un compania netamente Mericano.
Citgo a wordo funda na Merca y ta cay bou regimen di leynan Mericano y e ta mesun compania Mericano cu cualkier otro compania cu tin na e pais ey. Na Merca mes nan ta wordo mira hopi positivo y tur otro refineria ta traha cu nan na Merca cu e zeta cu ta bay Merca, gran parti di dje ta bay pa otro refinerianan Mericano y un parti chikito ta bay pa Citgo cu ta cumprando su zeta riba mercado internacional y na Merca e ta tuma un parti di zeta cu ta bin for di Venezuela tambe.
Nos a sondea tur posibilidad posibel cu tabatin y esun cu a keda habri tabata esun di Citgo y hunto cu Hulanda den debate na Aruba, por a mira kico tabata e resultado di esey y na fin di dia nos a negocia y yega asina leu hunto cu nos abogadonan di Aruba, cu abogadonan di Merca, cu expertonan local y internacional y di Hulanda, cu a asisti Aruba den esey, pa logra un trabou serio cu commitment grandi. Awe Citgo ainda tabatin mas cu 600 trahado ta trahando cu e proceso di rehabilitacion di e refineria na San Nicolas y lastimamente nos por a compronde for di ehecutivonan di Citgo mes, cu e embargo cu tin na Merca y diferente restriccionnan cu Merca a pone, cu na e momentonan aki ta dificil pa nan por haya e placa cu ya caba nan tin lenders na mesa cu nan ta cla pa sigui cu e proyecto di Aruba, pero e desaroyonan menciona ta pone cu e placa no por bin for di un manera of otro”, parlamentario de Meza a splica.
Nos kier a duna gobierno e recomendacion y mi ta urgi gobierno pa no pega soño, no drumi, lanta y traha, lanta y invita e hendenan aki mas bes na mes, bay sinta negocia cu nan. Bay bishita nan na Houston, tuma contacto cu nan, bay papia cu ehecutivonan den gobierno di Merca, bay papia cu abogadonan na Merca y duna tambe di bo parti si realmente bo kier e refineria aki logra pa nos economia di Aruba, e cuponan di trabou cu esaki ta trece cu esaki. Mi tin cu menciona cu Glenbert Croes(MEP) tambe a haci su esfuerso den henter e proceso aki di rehabilitacion di e refineria y a pesar di tabatin discusionnan politico cu su persona, el a haci hopi den e proceso aki pero awor por scucha for di propio minister Glenbert, cu e no tin autoridad mas pa papia y delibera ya cu tur esaki ta den man di prome minister Wever Croes”, parlamentario Mike de Meza a splica.
