Gobierno kier kita siguridad laboral

E articulo 1613X den nos Codigo Civil ta proteha trahadonan, dunando nan mas siguridad laboral. Pero esaki gobierno kier kita awor, contra deseo di e dos sindicato mas grandi, esta FTA y Seppa.

E articulo aki ta proteha e trahadonan di keda sin contracto defini. Tin un par di excepcion manera ora ta trata di trabou temporal of pa un proyecto. Pero normalmente un dunado di trabou mester ofrece un contract defini ora e 2 luna (maximo) como periodo di prueba, a pasa.

Awor gobierno kier cambia esaki pa dunadonan tin mas flexibilidad y por duna contract flexibel na un total di 2 aña. Despues e dunado di trabou ta obliga pa ofrece e trahado un contract defini.
Minister di Labor, Paul Croes, ta defende e cambio aki, indicando cu e gremionan Atia, WAB (construccion), Ahata (turismo) y SNBA (comercio San Nicolas) si ta sostene esaki. Motibo principal pa kita e articulo, segun e minister, ta cu esaki lo crea mas cupo di trabou pa hoben.
“E cifra di desempleo bow hobennan (15 ­-24 jr) na November 2014 tabata 22.8%. Na 2011 e tabata 23.6%. Un percentage mucho halto ainda. Cu e eleminacion di e articulo 1613X, lo crea posibilidad pa dunadornan di trabou duna e grupo aki tambe empleo bou di e condicionan nobo.” Tambe e ta expresa cu e cambio aki lo no afecta trahadonan cu ya tin un contracto indefini.

Critica
FTA a reacciona den prensa cu nan ta contra, pasobra esaki ta crea instabilidad di trabou. E ponencia di minister cu den e otro paisnan di Reino a mira resultado positivo, ta algo cu FTA no ta comparti. Na Aruba e situacion semper tabata diferente. E ta e unico pais den Reino cu tin e articulo menciona den su Codigo Civil pa cu locual a pasa den pasado, segun e sindicato. E tempo ey dunadonan di trabou tabata abusa e situacion di laga hende traha pa añanan largo sin duna nan un contract fiho. E articulo aki a keda introduci na añanan 90 pa duna trahado na Aruba mas derecho y siguridad.

Na Hulanda diferente estudio ta mustra cu desde gobierno su maneho pa trece mas flexibilidad laboral, gran parti di e trahadonan no ta haya un contracto indefini mas. Hopi biaha dunadonan di trabou ta busca manera pa evita di duna contracto indefini. Y specificamente hende di edad ariba 30 aña ta keda afecta. Esaki a crea un situacion cu mas y mas hende tin mas cu 1 trabou pa asina yega na e entrada necesario pa por biba.