Minister di asuntonan social y labor Glenbert Croes (MEP) a anuncia su intencion pa hisa salario minimo ‘substancialmente’. E suma no ta conoci te ainda pero ta papia di un cantidad di ‘mas cu 100 florin’. Alabes ta anuncia cu nan ta reemplasa management team di Departamento di Progreso Laboral (DPL) y maneho unda lo duna preferencia na trahado local.

E cambio aki sr. Croes a trece dilanti na prensa di un manera repentino, mirando cu ta ayera riba mesun dia e minister lo tabata di sinta cu departamento di Labor y Investigacion (DLI) pa asina mira di nan banda como departamento con miho por implementa e cambio aki.

E mandatario ta enfatisa cu e cambio aki mester tuma luga mirando cu e situacion na Aruba a ‘bira hopi peligroso unda e salario minimo a bira un tipo di salario maximo’. Sr. Croes a enfatisa durante e conferencia di prensa cu tin un gran porcion di trahadonan na Aruba cu ta haya dificil pa bay dilanti mirando cu e gastonan di bida diario ta demasiado halto.

Consulta pa cambia salario minimo

Manera nos a publica aña pasa na augustus, e salario minimo cu a hisa e tempo ey pa un cantidad di mas o menos 40 florin pa cada trahado cu e salario aki a bin di manera repentino. E cambio tabata uno ilegal mirando no tabatin un conseho di Conseho Social Economico (SER). E biaha aki minister Croes ta contesta cu el sigur lo tene cuenta y pidi SER conseho adelanta. Pero en

caso cu diferencia di opinion surgi entre SER y gobierno, lo bay argumenta esaki, e tambe ta bisa.

Sinembargo e mandatario a enfatisa cu e ta spera cu tur instancia cu nan lo acerca pa ronda di consulta, lo comprende cu esaki ta pasobra‘pa nos e nivel di pobresa, necesidad y dificultad ta contra tur conseho inaceptabel’. “Mi no por imagina mi ken of cua instancia lo tin e curashi pa bisa mi cu e salario minimo manera cu e ta aworaki ta bon. E problema cu nos tin ta cu por ehempel den mi caso, un persona cu ta cobra un salario di minister por ehempel, no por bin bisa cu salario minimo ta bon manera cu e ta. Dushi ora bo por bisa cu bo ta cobra un salario di minister, di manera di bisa. No, salario minimo ta miserabel.”

E mandatario a señala na e manera cu a hisa salario minimo aña pasa cu 2% cual pa mayoria di trahado a hisa esaki cu un suma chikito. “Definitivamente lo mi kier subi e salario minimo cu mas cu 100 florin, un suma substancial.”

Sr. Croes no kier divulga e suma specifico na momentonan aki mirando cu mester haci ronda di consulta cu e diferente instancianan concerni. Pero e minister lo a indica DLI ayera su pensamento concreto riba cuanto e mester ta pa asina e departamento pa asina por cuminsa ronda di consulta. E mandatario a enfatisa cu ‘mi no ta worry pa bin un par di problema. Tin ora nos mester por diferencia di opinion cu otro semper y cuando bin cu argumentonan’.

Aumento di salario minimo lo tuma luga ‘en todo caso’ prome cu fin di aña den december, segun minister di labor. Ademas lo duna cierto incentiva na comercio pa acomoda e aumento di salario minimo.

Huur y hipoteca ‘impagabel’

E problema cu minister Croes kier ataca no solamente ta afecta personanan cu salario minimo, pero esaki ta parti di e grupo cu ta sinti e efecto mas pisa. E mandatario ta splica cu te hasta persona cu ta gana ‘2000, 3000 florin ta haya nan mes na debido momento den un situacion unda no por mantene nan cas mas’. Un problema grandi segun sr. Croes ta cu ‘huur y hipoteca ta impagabel na Aruba’. Te hasta pensionadonan ta haya nan mes cu problema pa biba riba liña cora ‘pasobra e costo di bida ta demasiado halto’.

Preferencia na trahado local

Departamento DPL alabes tambe ta mira algun cambionan. E mandatario encarga cu labor a anuncia cu el a nombra un management team cu ta reemplasa e directora anterior di DPL. E management team aki ta encarga desde prome di februari pa loke ta trata e vision nobo pa DPL. E mandatario a splica cu e directora saliente a wordo consulta y a bay di acuerdo cu e cambio aki y ‘ta spera pa cu nan lo haya un funcion adecua na otro organisacion na momento cu un oportunidad cu pas habri’.

E vision nobo aki segun e mandatario ta encera cu lo bay duna preferencia na trahado local. Sr. Croes ta defini trahado local como cualkier ciudadano cu sea tin paspoort Hulandes, firma liber of tin un permiso temporario y ta estableci na Aruba caba. “Pa nos ta importante pa e personanan cu kier keda Aruba haya preferencia riba nos mercado laboral.”