Caso META VS GOBIERNO un farsa?

Meta Corporation a hiba gobierno corte pa duna nan e tereno banda di South Beach den erfpacht, y pronto. Gobierno, lesa ‘nos ministro encarga cu infrastructura’, a duna caba e opcion riba e tereno ey. Esey no ta algo cu e por a haci sin mas, sin pensa, sin analisa bo reglanan. Bo no ta djis saca e opcion anto despues bo ta bay wak ta kico ta aplicable den e caso. Aparentemente anto, di banda gubernamental e status di e tereno concerni pa cu e ley di Ordenamento Teritorial (ROP), no tabata un consideracion pa rechasa e peticion. Nos por a nota cu riba e mapa di ROP di 2008 ta aparece den e area concerni algun pida tereno, cu no ta marca como area berde o wetland. Nan tin e color di ‘zona turistico.’ Nos no sa sigur si henter e tereno di e opcion aki ta cay den e area di wetland. Esey hues por dicidi.

Awor, den e caso den corte nos ta tende di banda di gobierno cu ta intencion pa otorga e derecho di erfpacht. Solamente cu tin algun rekisito pa cumpli. A bin un retraso chikito den e caso pasobra e organisacion Aruba Birdlife Conservation (ABC) a hinca su mes (‘voeg’) den e caso, na banda di gobierno. Es decir cu ABC ta contra e demanda di e compania pa exigi cu, despues di emision di e opcion, mester sigui e emision di erfpacht. Nan ta haya cu e tereno concerni ta parti di e saliña (wetland) cu mester keda conserva como tal. Tambe pasobra gobierno mes tin como maneho (pa hopi aña caba) cu mester conserva esaki como un reserva natural pa exceso di awa den tempo di yobida.

Henter e asunto cu no a keda bon cla ainda, ta a base di kico gobierno a dicidi di otorga e opcion. A considera di antemano e status di e tereno pa cu ROP? Di parti gubernamental ta haya cu e tereno no ta parti di e area di wetland? Ta reconoce si cu e resto di e tereno ta pertenece na e categoria ‘wetland’ y no por ser emiti den erfpacht? E pregunta aki ta importante pasobra nos ta papiando di un area cu en berdad tin un balor importante como area di reserva pa almacena awa di yobida. Y cu por lo tanto tin un interes general pa no sacrifica henter e tereno na construccion comercial. Tambe pasobra e problemanan cu surgi despues cu exceso di awa, ta bira problema di nos tur y no solamente di e comerciantenan den e zona. Y no kere cu esaki ta imposible, pasobra mescos cu un tormenta a hera pasa riba nos e siman aki, e horcan cu tin mas di cien aña sin pasa, por dicidi di duna nos un bishita. Ban spera cu no ta asina, pero planifica pa calamidad ta un exigencia importante y tin ora otro interes economico mester hala un banda.

Tambe nos gobierno(nan) gusta ‘lubida’ cu articulo V.21 di nos constitucion ta prescribi e emision di tereno di domein via un ley (landsverordening). Semper gobierno(nan) a evadi e discusion tocante e necesidad di un ley pa por emiti cierto terenonan di interes economico grandi. Asina nos a haya cu ta emiti terenonan grandi, manera e caso di Tierra del Sol, parke di molina Vader Piet, parke di molina Urirama y Green Corridor, sin cu hamas a bay parlamento cu un ley pa haya autorisacion pa usa e terenonan aki. Si e tereno concerni aki ta di asina valor comercial grandi, y tin mas den e mesun area aki, anto lo mester un ley pa haci traspaso posible. Claro cu manera semper gobierno(nan) ta ignora constitucion, pero no por ta asina cu nos tambe ta custumbra cu no ta tuma constitucion na cuenta.

Si nos ta scucha bon, finalmente e compania lo haya loke e ta desea, a menos cu hues honra posicion di ABC. Sin embargo ta keda un pregunta fastioso: pakico ABC no a entama un caso contra gobierno, pa emiti opcion y seguidamente e erfpacht tambe, mientras e tereno ta cay den zona prohibi pa construi, segun nan opinion?

Finalmente, kico henter e circo huridico aki ta significa? Si gobierno a duna opcion caba, y no ta contra en principio pa emiti e tereno den erfpacht, e unico diferencia ta un cuestion di tempo? Gobierno kier warda; warda kico? Warda eleccion pasa, pa e asunto no bira un siguiente capitulo, despues di terenonan conflictivo na Malmok, despues di e negoshi cu erfpacht riba tereno comercial cu aliadonan di partido? Gobierno a cuminsa sinti e cayente politico di henter e escandalo di negoshi cu tereno? Pasobra e comentarionan negativo na e momento aki, cu ta yega na nos oido tambe, no ta bin solamente di hende cu ta pertenece na oposicion. Entre e 11.000 registrado pa haya tereno, lo mester tin un cantidad grandi di simpatisante di e partido den gobierno, cu ta contemplando e bochorno aki, y ta puntra nan mes pakico nan a keda man bashi, mescos cu e resto di esnan cu a haci peticion.