Awe gobierno ta tene su reunion cu e colegio di supervision financiero CAft. Un reunion cu a lanta cierto expectativa riba kico CAft lo bini cune, mirando cu e reunion aki a tuma luga mas tempran cu custumber.
Pero tambe considerando cu gobierno tin pensa di trata presupuesto 2020 y cambio den reforma fiscal den Parlamento pronto, a lo menos prome cu fin di februari awor.
Prome Minister, Evelyn Wever-Croes no a bay mucho den detaye riba kico gobierno su sentimento ta tocante e reunion cu nan ta tene cu CAft awe. Pero si el a referi cu tin un discrepancia entre loke CAft ta conseha, y di otro loke Raad van Advies (RvA) tambe ta conseha pa gobierno yena e gap financiero.
Prome mandatario a laga sa cu hunto cu su colega di Finanzas, nan a yega di anuncia cu nan ta bay cera e gap financiero di 2020, parcialmente pa medio di un parti di belasting y parcialmente cu otro fuente di entrada pa gobierno.
El a splica cu e biaha aki nan a move di locual antes tabata haci di cera e buraco financiero full cu belasting. Pero nan a dicidi cu e biaha aki, nan no ta bay haci mesun cos y nan a bin parcialmente cu otro fuentenan di belasting considera como incidental.
“CAft en general ta preocupa pa e otro fuentenan. CAft ta prepara pa e ta full belasting,” nos hefe di estado a bisa. E ta haya cu esaki ta un punto cu nan kier sigui delibera cu CAft awe. Ya cu di otro banda RvA ta di opinion – segun nos prome mandatario – cu pais Aruba no mester pensa mas riba belasting, pero bay mas pa explora otro fuente di entrada.
Pues e prome mandatario ta conclui cu basicamente gobierno ta meymey di e consehonan di ambos organo di supervision financiero. E ta cualifica e situacion aki como ‘un poco dificil’. Como gobierno nan ta spera cu nan por deal cu CAft y RvA, y e ta sigur cu nan lo sali afo, pasobra como responsabel di pais Aruba, nan ta pone interes nacional dilanti.
