Un caso unda un ciudadano ta buscando su derecho contra un decision di gobierno riba loonbelasting a resulta cu gobierno a keda cu 3 miyon florin inhusto cual mester a bay ciudadanonan.

Como seis luna pasa, 16 di december 2016, Corte di Husticia a dicta sentencia den un caso di apelacion, cu un ciudadano di Aruba a hiba dilanti contra gobierno di Aruba, specificamente e Inspector di Impuesto. E apelacion tabatin como base e caso dilanti Hues di Husgado di Prome Instancia (Gerecht in Eerste Aanleg) cu el a perde. Pa motibo di discrecion nos no ta divulga nomber di e persona.

E ciudadano a hiba e Inspector dilanti huez pasobra den aplicacion di e tabel di loonbelasting ( e asina yama Tariefschijventabel) pa 2011, no a tuma na cuenta cu e sumanan segun ley mester ta adapta na inflacion di e periodo prescribi. Lagando e indexering aki afo, tur ciudadano cu a haya retencion (inhouding) di loonbelasting cerca nan doño di trabao a paga un poco mas cu tabata necesario.

E ‘Ministeriële Regeling’ di december 2010 tabata menciona cu tabata deseabel pa stipula e sumanan di e tabel, lagando afo e aplicacion di articulo 25 di e Landsverordening Inkomstenbelasting. Bao di e ley aki tur dunado di trabao ta retene y entrega loonbelasting. E tabel di inkomstenbelasting ta conta tambe pa e loonbelasting, cu ta cay bao di Landsverordening Loonbelasting 1976.

Den articulo 25 di e ley di Inkomstenbelasting, cu e tempo ey tabata na vigor ainda, ta para cu mester adapta e sumanan den e tabel obligatoriamente cu e ‘tabelcorrectiefactor’ cu pa e aña ey tabata 1,027%. Esey no a sucede y realmente e tabel pa 2011 a keda mescos cu esun di 2010. Cu de paso tampoco tabata corecto pasobra no a aplica e factor di coreccion, cu pa e aña ey lo mester tabata negativo, en bista di cu e ‘prijsindexcijfer’ (CPI) pa consumo domestico tabata mustra un deflacion.

Minister a cambia ley
Cambionan den e ley di inkomstenbelasting y esun di loonbelasting cu a tuma luga den e tempo despues, via AB 2014, no. 54, cu a haci cambio tambe den e ley general di impuesto (Algemene Landsverordening Belastingen; ALB), a bin na vigor dia 1 di januari 2015, y a haci cu e ministro no tin obligacion mas pa aplica e factor di coreccion segun inflacion. E ley cu a regla tur e cambionan aki ta conoci como e ‘Regularisatieverordening’.

E ley ta bisa awor cu: “Na inicio di e aña calendario e Ministro por substitui e sumanan di entrada di e tabel, manera indica den articulo 24, prome inciso, cu otro.” Cu esaki, a keda regla cu awendia e ministro encarga no mester adapta e sumanan den e tabel, segun cu inflacion ta indica.

No a sigui conseho interno
En todo caso, pa e periodo pa cual e ciudadano a bay corte cu su apelacion, e aplicacion obligatorio si tabata na vigor, segun e ciudadano, aunke e ministro a opta e tempo ey pa ignora esaki. Segun nos fuentenan bon na altura di e situacion interno di e momento ey, e departamento mes a conseha e ministro pa sigui e pasonan cu ley tabata prescribi na e momento ey ainda, irespecto si tabatin pensa pa cambia ley, manera efectivamente a sucede despues tambe, manera ya ilustra.

E ciudadano a confronta primeramente un contratiempo den ‘Eerste Aanleg’, ya cu hues no a honra su punto di bista, cual tabata cu segun su persona a retene demasiado placa di su salario, consecuencia di e medida, segun su opinion, eroneo di e mandatario. Argumento di e hues di Prome Instancia tabata cu den e ley pa regularisa henter e situacion posteriormente, a stipula e tabel pa 2011 di nobo, motibo pa cual hues ta di opinion cu e situacion ‘onrechtmatig’ cu tabata existi, no ta existente mas. Y a pasa pa rechasa e demanda di e ciudadano.

Ley no tabata duna espacio
Seguidamente e ciudadano a acudi na Corte di Husticia cu su apelacion contra e veredicto di e hues di Prome Instancia. Den e demanda aki e pregunta crucial tabata: e retencion di impuesto pa un suma superior na e suma cu lo mester a aplica, si a tene cuenta cu e ‘tabelcorrectiefactor’, ta en pugna cu articulo 1 di e Prome Protocol di e Tratado Europeo pa proteccion di Derecho Humano (‘EP EVRM)  y e libertadnan fundamental. Den su evaluacion di e caso, Corte ta considera cu e ley, manera e tabata na 2011, no tabata duna espacio na e ministro pa keda sin aplica e correctiefactor. Argumento cu decrecimento di economia lo a causa menos entrada pa gobierno den e periodo ey, motibo pa cual e Inspector tabata defende cu, en bista di e interes chikito fiscal pa e ciudadano individual, compara cu e interes grandi di gobierno pa cu presupuesto, lo tabata hustifica pa laga aplicacion di e tabel di coreccion un banda.

Tambe Corte no a honra e apelacion cu gobierno (y e Inspector) a haci riba e “Memorie van Toelichting’ di e ley general di impuesto (ALB), unda ta argumenta cu e ley ta duna e ministro cierto facultad pa adapta, ya cu no por premira tur futuro desaroyo. Corte ta  haya cu (de)crecemento di economia y inflacion di prijs no ta circunstancia futuro no previsibel na cual e Memoria ta referi.  Ademas Corte ta haya cu den e ley di inkomstenbelasting ya gobierno tin un areglo detaya pa regla e cuestion di inflacion y su influencia riba ‘draagkracht’ di esunnan cu ta paga belasting. Ningun caminda, segun Corte, por haya cu e legislado tabatin intencion di duna e ministro e facultad pa pone e coreccion di inflacion den inkomstenbelasting un banda, desviando di e articulo 25 di e ley di Inkomstenbelasting.

Medida retroactivo contra EVRM
A keda e punto cu via cambio di ley, na vigor desde 1 di januari 2015, a haci cambio significativo den e ley di inkomstenbelasting, unda e ministro no tin obligacion mas pa adapta e tabel di inkomstenbelasting. E ciudadano ta combati esaki cu e argumento cu ta aplica medida riba e situacion na 2011 di forma retroactivo, loke lo ta en pugna cu articulo 1 di EVRM. Corte a yega, den un argumentacion demasiado elabora pa trata den e articulo aki, cu na 2011 dunado di trabao cu mester retene belasting riba salario, y empleado mester por confia (‘in goed vertrouwen’) cu pa e salario cu nan tabata haya na e momento ey – 2011 – nan lo no mester paga mas cu loke ta stipula pa ley na e momento ey. Den e sentido aki Corte ta haya cu e introduccion di e cambio di ley referi (entrante 1 januari 2015) a haci daño na e expectativanan hustifica di esunnan obliga pa retene loonbelasting y empleadonan.

Tambe Corte ta comenta riba e cambionan di ley introduci na 2015, cu Corte no ta mira kico tabata e motibonan di suficiente peso, manera interesnan financiero,  pa introduccion di e legislacion aki. Den e audiencia en todo caso no a trece esaki dilanti. Finalmente Corte ta yega na e conclusion cu, asina leu cu e tabel nobo pa 2011 ta conduci na retene mas loonbelasting cu lo tabata e caso si a aplica e tabel di coreccion obligatorio, e extra cobranza aki lo mester keda sin ehecuta, pasobra esaki ta en pugna cu articulo 1 di Prome Protocol EVRM. Cu esaki ta declara cu e apelacion di e ciudadano ta funda, ta anula e veredicto di Husgado di Proem Instancia pronuncia anteriormente y e apelante tin derecho riba restitucion di Afl. 15,40 di loonbelasting reteni inhustamente na januari 2011.

Cu esaki a conclui un ruta hudicial largo, cu a inicia na januari 2011 cu e prome apelacion di e ciudadano. A proposito, e persona aki no tabata e unico cu a haci apelacion, pero si e unico cu a procede te na Corte di Husticia.

Compensacion
Finalmente, kico ta e consecuencia di e proceso aki, cu a keda scondi tur e añanan aki for di bista di publico? Personanan experto consulta ta enfatisa cu tur pagado di belasting riba entrada na 2011 tin derecho di compensacion, mescos e ciudadano den e caso aki. Den cierto caso, manera persona cu un entrada hopi chikito, e no tin tanto sentido pasobra ta trata di masha tiki placa. Pa hende cu entrada grandi e ta bira mas interesante. Di banda di gobierno te awe no tabatin iniciativa pa compensa e pagado di belasting en general. Segun cu hende acudi pa reclama e compensacion, esaki lo mester tuma luga.

Pa loke ta e suma total cu gobierno a cobra di mas, cierto expertonan consulta den e caso aki ta kere cu e suma total cu gobierno a cobra di mas na 2011 lo ta den careda di Afl. 3 miyon, reparti riba e diesmil di persona cu a paga impuesto riba nan salario na e aña ey. Interesa?