Control ‘intensivo’ tumando luga na varios supermercado
Ayera mainta e team di Departamento di Asuntonan Economico, Comercio y Industria a hiba un control y observacion di prijsnan di productonan den supermercadonan. Esaki ta e prome paso den e maneho di minister Xiomara Ruiz-Maduro pa amplia e productonan di e canasta basico.
Hopi biaha tin pregunta riba e control di productonan cu cada bes productonan ta bira mas caro, con esaki ta sinta y kico ta pasando cu e control? E canasta basico tambe actualmente tin 11 producto y comunidad ta bogando pa amplia esaki for di basta tempo. “Nos tin nos leynan cu nos tin cu cumpli cu nan. Pa haci esaki posibel, e trabaonan ta wordo haci pa amplia e canasta basico na pais Aruba. Y p’esey awor akinan tin un control intensivo tumando luga pa locual ta e supermercadonan rond nos pais”, e mandatario a comenta ayera.
Actualmente e controlnan lo sigui na supermercadonan rond Aruba pa asina compila mas informacion. E investigacion aki ta pa calcula e margen di e ganashi riba e productonan di e canasta basico. Segun ley, e supermercadonan mester por duna e espacio na e controladonan pa haci e trabao akinan unda nan ta pidi e factura pa controla esaki segun nos ordenansa di prijs.
Control intensivo riba supermercadonan
Ayera 12 supermercado a haya bishita di locual ta e controladonan di Departamento Economico di Aruba pa asina bay controla un cantidad di producto manera berdura, fruta, den bleki, frozen, productonan di grano y otronan. Esaki ta algun di nan cu ta wordo controla na momentonan aki pa tin e hustificacion pa amplia e canasta basico. Na 2011 gobierno di Aruba a haci e intentonan anto bin cu un rapport. Tabata tin tambe locual ta un grupo di trabao cu ta consisti di hendenan di gobierno y den comercio. Nan a bini hunto y produci un rapport unda a pone algun producto cu nan ta mira ta necesario pa amplia e canasta basico cu esaki. Nada mucho mas no a pasa mas despues di esaki.
E mercado mes a percura pa bin cu mesun productonan pero di un otro tipo di marca, y asina e necesidad no a bini mas. Pero ultimo tempo comunidad mes ta bin cu e necesidad aki, cual ta algo cu Bon Dia mes a subi caya y traha un reportahe di dje aña pasa. Sin laga afo tambe e ponencianan di Bon Dia durante campaña electoral unda un di nan a trata e tema aki y tur partido bayendo eleccion a vota pro pa e prijsnan ta disponibel na tur caha.
E resultado di e investigacion akinan cu gobierno a inicia lo wordo presenta tambe den un grupo di trahado caminda lo haya importadornan grandi y chikito cu nan representantenan. Pa asina eynan nan hinca e recomendacion aki hunto y bay over na locual lo bira e ampliacion di e canasta basico.
Parti di sancion mester regla ainda
Pa locual ta e parti di sancion si a caso constata cu algo no ta klop cu locual e comerciantenan ta bende of ta para den canasta basico, esaki ta algo cu ta na caminda pa wordo regla. Tin cierto sancionnan pero door cu e controladonan no tin e posibilidad pa parti e sancionnan , esey tambe ta un procedura cu paralel na esaki ta wordo conseha na minister pa duna controlado un poco mas autoridad na momento cu nan constata un discrepancia.
Miho prijs pa comestibel
“Nos ta consciente cu tin gastonan halto di locual ta transporte pa locual ta e productonan akinan. Pues eynan tambe nos ta tene cuenta cu esaki. Pero na fin di dia, tur e investigacion, control y trabao su meta ta pa bay na un miho prijs di comestibel pa nos pais”, minister Ruiz-Maduro ta bisa.
E mandatario ta bisa cu mester tin un canasta amplio caminda por sigura cu comunidad por haya e comestibelnan necesario, na un prijs pagabel cu e control ta na su luga caminda cu e mester ta. E mandatario ta bisa cu e balor di free enterprise ta uno grandi pasobra nos economia ta basa riba esey. Mas cu claro mester purba pa un pueblo tin su necesidadnan basico na su luga, den e caso aki den forma di un canasta basico y riba dje e controlnan necesario. Cumpliendo cu e leynan manera nos tin e, e ta duna bo un caminda pa cana pa por amplia e canasta basico segun minister Ruiz-Maduro.
Por ehempel berduranan den bleki/frozen, fruta y productonan di grano manera nos a menciona, ta cosnan cu ta wordo uza mas hopi. Riba un lista mas amplio di cual nan ta wak sardin, tuna y cierto marcanan cu nan ta mira den esaki segun e mandatario. Pues e investigacion ta necesario pa hustifica e echo cu ta bay amplia canasta basico y por indica tambe den dje kico ta e productonan cu ta hiba e control aki. Pa por considera e producto cu por ta basico y cu mester por ta pertenece eynan cu prijs controla pues no pa stroba free enterprise segun e minister ta subraya.
