Gobierno Hulandes lo duna prioridad na personanan mayor di 60 aña, esnan den grupo di riesgo di salud, y trahadonan di cuido di salud den frontline, pa vacuna di coronavirus ora esaki bira disponibel, ministerio di Salud a anuncia ayera.
Delineando su strategia pa preveni hende contra e pandemia cu a cobra mas di 1.36 miyon bida mundialmente, e ministerio a bisa cu e vacunacion lo ta gratis y boluntario.
Autoridadnan di Salud Hulandes ya a cumpra 25 miyon hangua y freezernan extra pa e vacunanan cu mester ser warda na temperaturanan abao, e ministerio a bisa.
“Afortunadamente, Hulanda tin experiencia cu campañanan di vacunacion grandi”, minister di Salud, Hugo de Jonge a bisa. “Na momento cu vacunanan wordo entrega, tur cos ta cla. Esey probablemente lo ta e prome lunanan di 2021. Pero si fabricantenan di vacuna ta exitoso den entrega pa december, nos por cuminsa traha mesora.”
E ministerio a bisa cu basa riba reportenan recien di productornan trahando riba vacuna, ta spera di por vacuna alrededor di 3.5 miyon persona den prome cuartal di 2021.
Gobierno lo cuminsa ofrece vacuna na e aproximadamente 155mil persona kende ta biba den cas di cuido, y esnan cu ta biba den institucionnan psikiatrico como tambe e personal di esakinan.
Sin e costo di e vacuna mes, e costo spera pa e operacion di vacuna na e pais di mas di 17 miyon persona ta spera di ta entre 900 miyon euro y 1 biyon euro.
Ministerio di Salud a bisa cu Hulanda ta hungando un ‘rol activo’ den negociacionnan di Union Europeo cu cuatro desaroyadornan di vacuna, y e pais tin contract na luga pa casi 50 miyon dosis, suficiente pa casi 28 miyon persona. Negociacionnan ainda ta andando cu Moderna pa otro 3.1 miyon dosis. E costo total di e vacuna ta calcula alrededor di 700 miyon euro.
“E vacuna ta nos bentaha mas grandi pa sobrepasa e crisis aki, pa laga e pandemia nos tras”, De Jonge a bisa, urgiendo pa hende vacuna, ‘no djis pa bo mes, pero pa otronan. Nos tur tin responsabilidad di protege otro.”
