Ayera mainta a tuma luga un momento historico pa Hulanda, Aruba y demas islanan di Caribe Hulandes. Minister Presidente di Hulanda, Mark Rutte a ofrece oficialmente disculpa di gabinete pa pasado di sclavitud di Hulanda. Secretario di Estado pa Husticia y Seguridad, Eric van der Burg, tabata presenta na Aruba unda el a reacciona riba e discurso di Minister President Rutte.
Minister President a enfatisa durante su discurso cu e ta consciente di e responsabilidad gubernamental di Estado Hulandes den su forma historico, y pa esaki el a ofrece su disculpa pa e papel di Hulanda den envolvimento historico di su antecesornan gubernamental den permiti, facilita, promove, perpetua y beneficia di e negoshi di sclavitud. “Sclavitud cu a afecta e dignidad di e ser humano structuralmente pa añanan largo. Di e sclavitud di cual personanan a keda conscientemente reduci na mercancia di negoshi den forma repudioso y a keda ranca di nan circulo y nan famia”, Minister President Rutte a bisa.
El a indica cu pa inicia e reparacion ta bay ofrece un pakete integral di medida cu ta bay inclui entre otro stimulacion di conocemento, conscientisacion, reconocemento, conmemoracion y miho comprension di e efectonan cu sclavitud tin te dia di awe. Banda di esaki gabinete lo traha riba oportunidad igual y combati racismo y discriminacion.
“E historia cu nos a comparti ta laga nos bibando den siglo 21 cu asombro y berguensa pa actonan cu a tuma luga. E historia nos no por elimin’e cu un disculpa, y esey no ta e intencion di gabinete. Nos no por cambia pasado pero si reconoce esaki. Gabinete ta mira e reaccion di awe como un paso importante y no como un clausura”, el a indica.
El a agrega cu Gabinete ta mira e proceso di conscientisacion di e pasado di sclavitud como uno largo y kier pone un base pa un futuro uni na caminda pa e aña di conmemoracion di abolicion di sclavitud, cu ta inicia dia 1 di juli 2023.
Minister President Rutte a resalta cu aunke no por scucha e stemnan di pasado, e storia cu ta sali di tur e documentonan no ta semper bunita, hopi biaha e ta mahos, doloroso y hasta directamente bergonsoso. Esey ta conta sigur pa e rol di Hulanda den e historia di sclavitud.
El a sigui bisa cu te 1814 a sclavisa mas di 600 mil muhe, homber y mucha Africano cu a manda den barco bao condicionnan deplorabel pa e continente Mericano pa e traficantenan Hulandes di esclavo. Na Asia tambe entre 660 mil y 1 miyon di hende, no tin un cifra sigur, a keda trafica pa e areanan bao di autoridad di West Indische Company.
“E cifranan ta inimaginabel. E sufrimento humano cu nan a pasa ta ainda mas inimaginabel. Un sin fin di storia cu a wordo pasa door y testimonio di testigonan ta demostra cu no tabatin limite riba e crueldad arbitrario di e sistema di sclavitud. Y pues no tabatin limite pa e inhusticia y e teror”, el a remarca.
Minister President a haci referencia na e buki Anton de Kom cu ta conta tocante e trato y catigonan horibel cu e esclavonan mester a soporta. Den e buki por lesa di personanan cu a wordo tortura te muri, personanan cu a perde nan extremidadnan como forma di castigo of persona cu a wordo kima cu hero na nan cara.
“Nos por lesa di dje, nos ta na altura di dje, pero toch e destino horibel di e persona cu a wordo converti den esclavo ta casi inimaginabel”, el a agrega.
El a remarca cu e historia aki ta haya, den e ultimo añanan, mas atencion den exhibicion-, publicacionnan y tambe den e debate publico. El a enfatisa cu conscientisacion social ta tuma luga y door di esey tambe tin un cambio den mentalidad, algo cu ta bon, apropia y necesario, pasobra e silencio a duro mucho hopi tempo, segun el a comenta.
Personalmente e tambe a experiencia un cambio di pensamento. El a conta cu pa un tempo largo el tabata pensa cu no tabata posibel pa tuma responsabilidad significativo pa algo cu a pasa asina hopi aña atras. Pa un tempo largo, el a sigui conta, cu el a pensa cu Hulanda su rol den e historia di sclavitud tabata algo di pasado, pero e tabata ekiboca.
“Siglonan di opresion y explotacion tin su efectonan ainda den e presente. Den stereotiponan racista, den patronchinan di discriminacion di exclusion, den desigualdad social y pa kibra e patronchinan ey nos mester enfrenta e pasado cu honestidad”, el a enfatisa.
Secretario di Estado pa Husticia y Seguridad, Van der Burg a menciona den su discurso cu e ta agradecido na esnan cu pa añanan largo a bringa pa resisti sclavitud. “Hopi di e mayornan di nos ta esnan cu a sufri a causa di e pasado di sclavitud”, el a remarca.
Un punto hopi specifico cu el a menciona ta cu e sclavitud na Aruba tabata menos intenso compara cu otro paisnan, pero cu esey ta enfatisa mas e crueldad di esnan cu a sclavisa e persona.
E Secretario di Estado a indica tambe cu e ta haya Virginia Dementricia, Arubiano cu a nace den sclavitud, un persona admirabel y a haya remarcabel cu e tabata e briyo y curashi pa resisti su opresion.
Moviendo pa dilanti Gobierno Hulandes ta saca un man pa colabora hunto cu Aruba pa surpasa e retonan di e historia di sclavitud contribuyendo na e digitalisacion di e archivo nacional pa asina mehora e accesibilidad na documentonan cu ta yuda tur persona cu ta interesa pa sa mas di nan pasado yega na e informacion necesario.
