Parce cu tin hende cu no kier siña. Ta caba di palabra cu gobierno Hulandes (ministro Plasterk) cu ta laga e asunto di nombramento di Gobernador te aki, y cu ningun di e partidonan lo sigui comenta riba e asunto. Y kico ta pasa? Ministro Presidente ta haya ta bon pa saca un comunicado di prensa pa purba convence Aruba cu el a bay Hulanda y a mustra Plasterk cu e ta full fout y a logra tambe cu a reconoce esey. Nos Hulandes no ta malo, pero ta dificil pa nos lesa esey den e declaracion conhunto. Ademas, ki balor Hulanda mester duna na bo palabra como Prome Ministro? Net nos tabata di bay dera e asunto aki tambe, pero nos mester dedica atencion atrobe na esaki. Ban spera pa ultimo biaha.
E texto na Hulandes no ta bisa cu gobierno Hulandes a reconoce cu nan ( y nan so) a percura pa e proceso di nombramento no gana premio di beyesa. Nan ta consciente cu e proceso no a cana e caminda bon. Den esey ta logico cu nan tin cierto responsabilidad. Ta inusual cu gobierno Hulandes ta haci proposicion na Gobierno di Reino sin un proposicion di gobierno di Aruba. E caminda normal ta keda cu gobierno insular ta haci proposicion. Pero no ta trata di un proceso di consulta cu no a tuma lugar, sino uno cu a keda tranca na caminda, y ken ta e culpable? Gobierno di Aruba, pa ser mas exacto, nos Prome Ministro. Ora tanto luna pasa a bisabo bon cla cu e candidato a keda descarta pa motibo di edad, manera Eman ta admiti awor, mester a sigui busca un candidato apto.
Pero no, mester a cuminsa un guera di trinchera cu gobierno Hulandes cu e no por gana, pa e simple motibo cu ta gobierno di Hulanda, y ora sinta como gobierno di Reino tambe, tin e ultimo palabra! Prome Ministro Eman a nenga di haci loke e mester a haci den e procedimento usual y esey ta bin cu un otro candidato. Pero den su santo soberbia esey naturalmente tabata lo ultimo cu e kier a considera! Un ehemplo tipico di hende cu ta cuminsa kere cu nan poder ta eterno y ilimita. Cu un gobernador saliente pa cinco luna caba y ningun vista riba un salida drechi di e asunto aki, gobierno Hulandes a tuma su responsabilidad y a dicidi di desvia di e caminda normal di yega den bon ambiente na un nombramento cu ta carga aprobacion di ambos banda y… di pueblo di Aruba en general.
E culpa cu e caminda normal a resulta blokea ta bin completamente pa responsabilidad di nos Prome Ministro, cu na e altura aki mester por a siña cu goberna drechi tin di haci cu maneha poder, pero mas cu tur cos maneha poder cu sabiduria. Y esey ta conta sigur si bo ta envolvi den consulta pa un proceso, unda bo mag propone pero bo NO tin e decision final. Bo a tranca e proceso di consulta, anto ora esun cu tin e decision final ponebo un banda, bo kier bin yora? A sinta lunanan largo haciendo nada, pensando cu di e manera aki por a troce brasa di gobierno Hulandes, cu finalmente a djis mustra ta ken ta manda. Riba nan tabata cay e reponsabilidad tambe cu tabatin cinco luna caba un Gobernador cu a coopera kedando mas tempo den e puesto, pero tur esaki tin un limite. Otro asunto cu gobierno di Aruba a ignora, asina leu cu nos sa, ta e consulta cu e otro partidonan den parlamento. Na 2004 esey a tuma lugar, unda en berdad oposicion di e tempo ey (AVP) a apoya candidatura di nos actual Gobernador, cu tabata un politico activo, loke te na e momento ey no tabata e lugar pa busca un Gobernador nobo. Aceptacion, di banda di oposicion e tempo ey, sigur a keda facilita pa e persona cu Refunjol tabata como politico, cu nunca a rebaha su mes na e bochincha di custumber den parlamento. Y esaki ta loke Aruba masalmente a reconoce tambe den e persona Alfonso Boekhoudt, cu tin hopi di e cualidadnan personal aki cu ta necesario pa ta un bon Gobernador.
Y pa mas cu gobierno di Aruba ta keda insisti cu no por nombra un Gobernador nobo sin cu e proposicion bin di nan, Hulanda a mustra nan cu esey si por y ki ora por? Ora gobierno di Aruba faya den haci su trabao drechi den e asunto aki, proponiendo candidato aceptable pa gobierno Hulandes, y na tempo! Y pa defini candidato apto, en berdad ta existi cierto criterio, un di nan esun di edad cu gobierno ta trata di ignora, dunando desinformacion na publico. Y con cu gobierno di Aruba kier bira o troce e asunto aki, nan no por nenga cu Prome Ministro a bay Hulanda pa bolbe cu un revocacion, y el a bolbe man bashi! Coreccion: cu e compromiso cu e dos gobiernonan lo sigui ‘coopera estrechamente’ riba varios tereno. Cu otro palabra: Hulanda ta sigui vigila nos! Exito!
