Gobierno Hulandes a cuminsa un subasta ayera di frecuencianan wireless 5G nobo, cu companianan di telecomunicacion entregando ofertanan pa nan por provee clientenan cu e rednan mas lihe di comunicacion mobil.
Gobierno a bisa cu e subasta online di frecuencianan di 700, 1400 y 2100 megahertz lo dura algun dia of mas largo, y lo genera un minimo di 900 miyon euro.
Lo subasta un frecuencia di 3,500 megahertz na un fecha binidero, pasobra su uso pa rednan 5G por interferi cu trabou di un facilidad di intercepcion di comunicacion di satelite den nort di Hulanda, usa pa agencianan di inteligencia Hulandes.
Ministerio Hulandes di Asuntonan Economico ta bisa cu no lo duna comentario riba e subasta te cu esaki keda completa.
E subasta ta pa bandwidth usa pa proveedornan y no ta involucra directamente e infrastructura di rednan 5G cu ta e enfoke di debate internacional. Merca a busca di persuadi aliadonan pa rechasa fabricante di ekipo di telecomunicacion Chines, Huawei, como un proveedor di infrastructura 5G, pa motibo cu ta teme cu gobierno Chines lo por usa esaki pa spionahe of sabotahe. Huawei consistentemente a rechasa e acusacionnan.
