(NLTimes) – Hulanda ta spera di evacua centenares di ciudadano Hulandes for di Libanon “dentro di algun dia,” segun minister di Exterior, Caspar Veldkamp a bisa ayera. Ta bay transporta nan na Hulanda den avion militar, ya cu nan ta den peliger di keda atrapa den Medio Oriente pa motibo di un ofensiva aereo y terestre di Israel.
Hulandesnan cu kier bandona Libanon por registra online cu e ministerio.
Veldkamp no sa exactamente cuanto Hulandes actualmente ta na Libanon y por probecha di e oferta di gobierno pa repatria nan. Pero e ta “calcula centenares a lo menos,” maske “experiencia ta mustra cu semper por ta un tiki mas o menos.”
E ministerio anteriormente a declara cu no tabata sa exactamente cuanto ciudadano tin na Libanon pasobra nan no ta obliga di informa gobierno Hulandes ora ta biaha of bay biba na Libanon. Ainda no ta obligatorio pa nan registra, pero e minister ta recomenda ciudadanonan Hulandes haci esaki.
E prome vuelo regla pa ehercito ta bay sali “dentro di algun dia,” segun e minister. Ta bay ta un vuelo directo for di Libanon pa Hulanda, pero Veldkamp no a revela e aeropuertonan di salida y yegada. Un vocero di ministerio a bisa cu ainda no ta cla cuanto vuelo ta bay ta involucra den total.
Ademas, gobierno Hulandes a tuma stapnan pa sigura “cu hende por, si ta posible, join vuelonan organisa pa otro paisnan si tin espacio disponible.” Otro paisnan Europeo ya a anuncia den dianan recien cu ta bay repatria nan ciudadanonan. Hulanda tambe ta evaluando si por reserva asiento riba vuelonan comercial ainda, ya cu hopi hende ya no por haci nan propio reservacion priva.
Otro paisnan incluyendo Canada, Alemania y Reino Uni ya a cuminsa e proceso pa repatria nan ciudadanonan. Por ehemplo, Canada a reserva centenares di ticket di avion comercial, y Reino Uni a prepara un vuelo charter for di Libanon. Partidonan di oposicion den Parlamento Hulandes tambe a haci un yamado pa e gabinete ayera pa tuma accion pa sigura cu Hulandesnan cu kier bandona Libanon por haci esaki.
E minister ta rechasa cu e ta hopi mas laat cu otro paisnan evacuando nan ciudadanonan. “No, nos ta bayendo na e mesun velocidad. Algun pais a cuminsa comunica mas trempan, talbes externamente.” Veldkamp a bisa cu el a dicidi pa comunica e declaracion solamente ora e tabata sigur cu por ehecuta e vuelo di evacuacion.
Ultimo weekend, tension entre Israel y Libanon a aumenta considerablemente despues cu lider di Hezbollah, Hassan Nasrallah a ser mata den un bombardeo Israeli diabierna. E grupo cu sosten militar y politico di Iran ta clasifica como un organisacion terorista pa Hulanda. A pesar di esaki, e minister a dicidi te diamars pa repatria. “Pasobra awo nos ta mira cu tambe ta dificil pa bandona e pais via otro pais, paisnan Arabe por ehemplo,” Veldkamp a splica.
Prome cu esey, tabata “responsabilidad personal” di Hulandesnan pa sigura cu nan bandona Libanon, segun e minister, pasobra nan a scoge pa keda na e pais a pesar cu e ministerio a emiti un advertencia di biahe Codigo Cora. Embahada Hulandes na Beirut ta den contacto cu algun ciudadano Hulandes. E embahada ta bay keda habri por lo pronto. Anteriormente, e ministerio varios biaha a haci un yamado pa Hulandesnan na Libanon bandona e pais mientras ainda nan por sigura transporte comercial.
Veldkamp a reafirma e posicion di Hulanda considerando Hezbollah un organisacion terorista durante un discurso na Asamblea General di Nacionnan Uni siman pasa. “Nos tambe ta sosteniendo completamente esfuersonan pa baha candela entre Hezbollah, organisacion ilicito di teror, y Estado di Israel. Pasobra e riesgo di mas escalacion y mas casualidad civil ta keda halto,” el a bisa.
