Contrario na loke e comunicado di prensa di Prome Ministro Evelyn Wever-Croes ta sugeri, cu su intervencion personal den reunion di Conseho di Ministro di Reino lo a calma e situacion, tin informacion cu ta indica cu gobierno Hulandes, den reunion di Gobierno di Reino semper den mayoria, lo a pone bon cla cu no ta acepta loke parlamento di Aruba a haci luna pasa, unda a practicamente elimina e supervision Hulandes for di e ley di supervision. Na luga di e organo mas halto di Reino, awor Staten di Aruba lo mester bay fungi como supervisor, na ken CAft lo mester raporta, segun e cambio di ley aproba luna pasa.
E portal Caribisch Netwerk a informa cu secretario di estado Raymond Knops a declara cu parlamento di Aruba a caba cu e supervision cu Conseho di Ministro di Reino tin via CAft cu e amienda aproba y cu gobierno di Hulanda no ta acepta esaki. Tambe Knops a declara cu tocante e caso tin un discusion, cu Aruba, andando den Conseho di Ministro di Reino. Esey ta haci cu por lo pronto lo no tin un ‘aanwijzing’ (instruccion) pa coregi e asunto ainda. Tambe Knops a bisa cu e cambio di ley lo no conta cu firma di Gobernador di Aruba, pasobra “Gobernador ta na altura cu tin un discusion andando den seno di Conseho di Ministro di Reino, pues e no lo firma esaki.”
Otro siman diabierna lo tin un ultimo reunion extraordinario di Conseho di Ministro di Reino, cu normalmente ta reuni solamente un biaha pa luna riba prome diabierna di luna. Despues reces tanto na Aruba como Hulanda ta cuminsa. Sin embargo ta parce cu e asunto aki lo keda posterga te despues di reces.
Di otro banda e portal Hulandes Koninkrijksrelaties.nu a informa cu Gobierno di Aruba, representa tambe pa su Prome Ministro, a haya di tende cu Aruba por uza e reces di verano aki pa percura pa Staten di Aruba trece e LAft atrobe den linea cu e acuerdonan entre gobierno di Aruba y gobierno di Hulanda. Esaki ta implica deshaci di e amienda cu a introduci banda di e cambionan acorda entre Aruba y Hulanda. Si esey no sucede, anto Conseho di Ministro di Reino lo impone esaki, segun e portal.
Nota di redaccion: E comunicado di prensa completo di Prome Ministro Wever-Croes tambe ta aparece riba e pagina aki.
