(NLTimes) – Gobierno Hulandes ta trahando riba un ley pa para cu e apertura di franquisianan di ‘fast food’.
E ley lo yuda e municipalidadnan bisa no na restaurantnan di ‘fast food’ nobo habriendo den cada skina, manera e ciudadnan grandi a pidi aña pasa, Secretario di Estado Maarten van Ooihen di Prevencion a conta e corant AD.
“Algo mester ser haci. Un den cada 7 mucha ta sobrepeso, y cosnan ta baendo den e direccion incorecto. Den clasenan social mas abao, e ta un den cada 3,” van Ooijen a conta. No tin nada den e acuerdo di e coalicion tocante combati e tipo di negoshinan aki, sinembargo segun e Secretario di Estado, e ley ta encaha cu e coalicion su metanan di salud.
E gabinete anteriormente a purba di motiva su pueblo come mas saludabel pa medio di introduci un “sugar tax” (impuesto di sucu), sinembargo Van Ooijen ta preocupa cu esaki no ta suficiente. “Bo no kier tin un exceso di e tiponan aki. Come un hamburger of sandwich no ta problema. Pero mi no kier e cantidadnan grandi aki y mucho menos asina cerca di e scolnan,” el a declara. “Claramente, bo por sigui come batata. Pero mi kier pa esaki ta un scohencia personal, no controla pa e avisonan di ‘fast food’ na cada skina cu bo mira.”
Gabinete te ainda ta trahando riba e detayenan y riba con e limitacionnan aki lo funciona. Van Ooijen lo presenta e opcionnan na parlamento durante e aña aki.
