Gobierno Hulandes su ministerionan a gasta 1.4 biyon Euro aña pasa pa contrata personal externo, cual ta un aumento di 60% desde 2011, segun fuente AD a raporta diaranson.
6 di e 12 ministerionan no ta gastando conforme e regla cu ta stipula pa gastonan di personal externo no ta mas halto cu 10% di e gasto di personal general. Ministerionan di Enseñansa y Asuntonan Economico ta gastando 20% di nan presupuesto pa personal riba contractnan externo. Ministerio di Enseñansa a declara den nan reportahe anual cu nan necesidad pa contrata forsa laboral externo ta asina pisa cu ‘un reduccion pa 10% riba termino corto no probabel’.
En particular, agencia di prestamo di enseñansa DUO ta depende grandemente riba expertonan di IT externo. Asuntonan Economico tambe tin necesidad grandi riba personal di IT y ta bisa cu djey e problema ta bin. Mas o menos 40% di e placa cu gobierno ta gasta riba personal fuera di aparato gubernamental ta bay pa personal tecnico, yegando na un total di 530 miyon Euro aña pasa. Esaki ta mustra un contraste cu e cantidad cu gobierno ta gasta riba conseho legal y servicionan di accounting, cual ta yega na un suma total di 14 miyon Euro y 28 miyon respectivamente.
Profesor di mercado laboral na Universidad di Tilburg Ton Wilthagen a bisa AD cu e personal fuera di gobierno semper ta mas caro y e ta duda cu nan ta haciendo lo suficiente pa atrae expertonan di IT cu talento. ‘Gobierno no ta un mal dunado di trabou’, el a señala. “Bo ta haya siguridad cu bo lo keda cu bo trabou y hopi dia liber. Esey nan por uza pa purba bende e trabounan, pero e no ta pasa.”
