(NLTimes) – E trato di e propuesta di ley pa establece regulacion di disputa (geschillenregeling) pa Reino den Eerste Kamer, a keda posponi riba peticion di gobierno Hulandes.
Secretario di Estado demisionario pa Asuntonan Interno y Relacionnan di Reino, Raymond Knops, tambe den nomber di prome minister encarga di Asuntonan General, Mark Rutte, a manda un carta na Senado ayera pa solicita pospone trato di e propuesta di ley pa resolucion di disputa den Reino.
Como motibo pa pospone e trato, Knops a declara: “Den ultimo dianan a bira cla cu no tin sosten pa e propuesta di ley aki dentro di parlamentonan di Aruba, Corsou y St. Maarten.” E Secretario di Estado a pidi pa pospone e trato ‘pa permiti Conseho di Minister di Reino (Rijksministerraad, RMR) delibera riba e situacion cu a evoluciona’.
E trato di e propuesta di ley den Senado tabata programa pa diamars, dia 1 di juni proximo. E trato lo a tuma luga den presencia di delegacionnan di e tres parlamentonan di Hulanda Caribense, como tambe e ministernan Plenipotenciario di e tres paisnan na Den Haag; como tambe prome minister di Sint Maarten, Silveria Jacobs, ken ya ta na Hulanda pa negociacionnan y tabata presente den reunion di Conseho di Minister di Reino ayera. Informacion di e reunion aki ta disponibel riba pagina 21 di e edicion aki di Bon Dia Aruba.
E delegacion di Sint Maarten, consistiendo di presidente di Parlamento, Rolando Brison, parlamentarionan Sarah Wescot-Williams y William Marlin, y secretario general di Parlamento, Garrick Richardson, tabata programa pa bandona Hulanda ayera diabierna, pero no lo biaha te proximo aviso, segun Brison a confirma. E delegacion di Parlamento di Aruba ya ta na Hulanda.
Presidente di Eerste Kamer, Jan Anthonie Bruijn, a anuncia algun ora despues di ricibi carta di Knops cu el a dicidi di otorga e solicitud di e Secretario di Estado. El a haci esaki despues di consulta cu e Comite Permanente pa Relacionnan di Reino den Senado Hulandes.
