Algun tempo pasa gobierno conhuntamente cu e iniciadornan di e proyecto comercial di vivienda pa clase medio a anuncia e inicio di e proyecto aki den area di Eagle, conoci como Caribbean Town, cu lo ta e promer den su categoria di construccion vertical. Asina lo ta cumpli cu deseo di gobierno pa mira mas proyecto di vivienda cu ta tene cuenta cu e actual y futuro escasez di tereno pa vivienda, ofreciendo espacio pa biba riba diferente piso, sin cu esaki ta exigi tanto superficie cu no tin disponible mas.

Esey riba su mes ta un obhetivo concreto y corecto, unda gobierno a otorga tereno bao condicion di erfpacht na e propietario(nan) di e proyecto, cu despues lo mester cana nan caminda comercial, coriendo tur riesgo y asumiendo tur responsabilidad manera tur otro empresario riba e isla aki.

Ta straño pa ripara despues cu gobierno, a traves di e Departamento di Infrastructura y Planificacion (DIP), ta keda activamente envolvi den registracion y promocion di e proyecto, unda via website di DIP por haci registracion pa e proyecto aki. Motibo suficiente pa averigua un que otro. Riba website di DIP ta aparece pa nos sorpresa cu ta solamente posible pa inscribi pa e proyecto aki, si un persona den e añanan anterior, entre 2012 y 2015, tabata registra cu un peticion pa tereno erfpacht pa construccion di residencia. Solamente si bo click cu bo ta confirma di tabata registra den e periodo ey, bo por haya acceso na e formulario pa yena bo datonan personal, pa por entrega esaki.

Redaccion di Bon Dia Aruba a haya straño cu ta pone tal exigencia na candidato cu ta interesa den cumpra propiedad priva den e proyecto comercial aki, sigur si ta exclui otro ciudadano cu talvez tambe tin e entrada pa haya hipoteca (comercial) na e nivel cu e compra aki ta requeri. E prijsnan mas abao ta na Afl. 150.000,- y esun mas halto mas cu doble esey, loke pa gran parti di nos poblacion ya ta inalcanzable. Es decir, cu gobierno ta haci un preseleccion di ciudadano financieramente califica, via un extra exigencia cu nan mester tabata registra pa a pidi tereno den e lapso menciona di tres aña.

Redaccion di Bon Dia Aruba a consulta cu un hurista cu hopi experiencia den e legislacion corespondiente, cu a desea di keda anonimo, y a haya como opinion cu ley di emision di ‘domeningronden’ no ta duna espacio pa selecciona hende pa un proyecto asina, ya cu e ley no ta aplicable na e personanan aki, solamente na e doño di e proyecto cu ta haya e tereno den erfpacht. Ademas e seleccion di persona a base di criterio imponi pa gobierno ta duna espacio pa corupcion, anto den un asunto unda gobierno no tin nada ta haci, pasobra ta e compania lo mester sa ta ken e ta scoge como cliente. Ta imaginable cu ta pone como condicion cu e persona cu ta adquiri un propiedad mester ta residencia na Aruba, pero exclui tur esnan cu no tabata registra pa peticion den e lapso di tres aña ey ta absurdo, segun e fuente consulta. E manera di opera aki den futuro tambe ta yama interogante, pasobra kico ta bay pasa ora un propietario di un apartamento o vivienda den e proyecto ta desa di bende su propiedad. “E ora e propietario nobo tambe mester pasa den screening di gobierno?” tabata e pregunta cu e experto consulta a duna ‘pa pensa ariba’.

Gobierno mester concentra riba vivienda popular

Mientras di un banda gobierno ta mete, na nos opinion na un manera indebido den un proyecto di vivienda pa hende ‘cu por yuda nan mes’, nos tin varios aña cu no ta sucediendo practicamente nada riba tereno di crea vivienda pa e casi dos tercera parti di e poblacion, cu no por bay banco, ni ningun otro institucion financiero pa un hipoteca, pasobra nan entrada no ta pone nan den e categoria cu por haya esaki. Den pasado tabatin intento pa haci algo na e problema enorme aki, sigur despues cu nos poblacion a crece asina rapido den añanan 90 y despues. Durante gobernacion di 2009 pa 2017 tabatin un maneho cu tabata considera Aruba un ‘isla di 5 strea’ unda tur ciudadano lo mester por a haya tereno pa traha nan propio cas. Consecuencia di e maneho aki nos por a mira, unda parcialmente e grupo cu si por afford traha nan cas a haya oportunidad, pero esey no a yuda e demanda baha. Por bisa anto cu Aruba conoce 12 aña di gobernacion cu no ta haciendo nada pa soluciona e problema di vivienda pa esnan cu no tin suficiente entrada, pero ta depende di programa gubernamental pa nan por sali di e apartamento den cura di cas di hende, o di e cas cu nan ta comparti cu varios otro famia.

No ta necesario pa gobierno ta hinca asina aki den un proyecto comercial, cu bien por percura pa nan propio promocion, pasobra si tin un base economico faborable pa esaki, no tin necesidad di ta cana na man di gobierno den e asunto aki.