Prome Minister, Evelyn Wever-Croes a referi na e situacion di migrantenan Venezolano cu ta sacrifica nan bida purbando di drenta di forma ilegal na Aruba.
Mas boto ta sigui drenta cu ciudadano Venezolano desespera pa e situacion interno den nan pais, caminda recientemente dos boto carga cu Venezolanonan a drenta, un di nan a logra drenta exitosamente y e di dos, nos autoridadnan a gara gran mayoria di nan.
Wever-Croes a expresa su preocupacion cu e situacion aki y tambe a haci yamado pa nos hendenan no presta na nan mes den e trafico ilegal di hende, cu ta un caso cu dificilmente bo por saca bo curpa afo. “Aki na Aruba tin hende cu ta pidi nan bin…”, segun Wever-Croes
P’esey el a haci un apelacion fuerte na esunnan cu ta haci e tipo di invitacion aki, pa no hacie mas. Ya cu trece hende di e forma aki no ta algo legal, sino cu e ta ilegal y contra nos leynan. Ademas, e ta un riesgo grandi y trece hendenan asina ta un delito relaciona cu trafico di hende.
