(AP) — Agencia di seguridad riba caminda di gobierno Mericano a agrega otro fatalidad involucrando un auto Tesla na e lista di accidente cu ta investigando pa motibo di e uso di sistemanan di conduci auto parcialmente automatisa.
Un team special di investigacion di accidente a bay na un accidente dia 26 di juli na Long Island Expressway na New York den cual un homber a perde su bida pa un SUV Tesla Model Y, segun Administracion Nacional di Seguridad riba Caminda, NHTSA na Ingles, a bisa.
E morto ta trece na 10 e cantidad di accidente fatal na cual e agencia a manda un team, nuebe di cual a involucra autonan marca Tesla. Un total di 12 persona a perde nan bida. E unico accidente fatal cu no tabata involucra un Tesla tabata na maart di 2018, na momento cu un vehiculo autonomo di test di Uber a dal un peaton na Tempe, Arizona.
E accidente na New York ta riba un lista actualisa di esnan bao investigacion di NHTSA cu a keda divulga riba diabierna ultimo.
Departamento di polis di New York a bisa cu anteriormente, riba dia 26 di juli, un homber di 52 aña a perde su bida na momento cu un Tesla a dal den dje mientras e tabata cambia un taira flat riba su auto, cu tabata parkea den banda links di e Long Island Expressway na Queens. E chauffeur di e Tesla a keda na e escena, y e departamento a identifica e victima como Jean Louis di Cambria Heights, New York. Riba diabierna, polis a bisa cu nan ta trahando hunto cu NHTSA den continuacion di e investigacion y no a haci ningun aresto.
A revela e fatalidad adicional alrededor di tres siman despues cu NHTSA a habri un investigacion formal riba e sistemanan di core auto parcialmente automatisa di Tesla y con nan a dal den vehiculonan di emergencia staciona. E investigacion ta yega mientras e agencia a bira mas agresivo den evalua sistemanan automatisa pa core auto desde cu presidente Joe Biden a asumi su cargo. Durante añanan NHTSA tabata duda pa regula e sistemanan, cu tin potencial tremendo pa scapa bida.
Tesla, un compania basa na Palo Alto, California, den pasado a yega di bisa cu Autopilot ta un sistema di asistencia di chauffeur y cu e chauffeur mester ta cla pa interveni na tur momento. Hunta Nacional di Seguridad di Transporte y otronan a critica Tesla, bisando cu mester un sistema mas fuerte pa monitor chauffeur pa sigura cu nan ta paga tino.
