Minister di Labor y Asunto Social, Glenbert Croes (MEP) a anuncia e decision di e gobierno actual pa elimina e Citgo desk y bin cu otro oficina cu nomber y reglanan nobo pa recluta trahadonan local pa e refineria.

Segun minister Croes, e Citgo desk nunca a funciona. E a laga sa cu tin 1200 trahado local registra pa traha den Citgo y practicamente niun a wordo contrata. Nan ta lantando un oil and gas industrial desk nobo cu ta bay conta pa Citgo y Repsol. Nan ta bay tin un registro di tur e trahadonan local cu kier traha den e industria aki. Pero tambe di tur e contratistanan local cu kier traha den e sector aki pa nan haya preferencia pa traha den e refineria.

Tur ontheffing para
E mandatario a declara cu preferencia ta wordo duna ta tur trahadonan local. Como trahadonan local e kiermen tur trahadonan cu tin nacionalidad Hulandes, no ta importa si bo a nace na Aruba of no. Tambe esun cu tin firma liber of e trahadonan di afo cu ta na Aruba caba trahando cu un permiso ta haya apoyo. “Tur hende cu ta akinan activo irespecto unda bo a nace nos ta bay percura pa tur hendenan cu ta akinan por haya preferencia”. Tambe el a indica cu a para tur ontheffing of dispensacion cu a wordo duna na e contratistanan di e refineria, pa asina nan bay busca den e mercado laboral local trahadonan.

Igualmente e mandatario a bisa cu ‘ontheffing a bira sinonimo di corupcion’. Pa tal motibo e decision a cay di para tur dispensacion te proximo aviso. Igualmente minister Croes a informa cu tur esunnan cu a wordo otorga caba cu no a yega ainda na un permiso, tambe ta wordo evalua y investiga. Nan kier check cu si tin corupcion involucra cu nan of si nan a wordo duna di un forma indebido.

E decision aki tin di haber cu si un doño a haya un dispensacion pa trece un trahado di afo unda cu por tin un trahado local cu por eherce e funcion. E mandatario a bisa cu awendia tin e fenomeno cu e doño di trabou ta bisa cu e persona ta ‘over cualifica’, pero esaki no mester bira un excuus pa no tuma un hende . E no ta bay acepta niun sorto di excuus pa no acepta un trahado local cu mester di un trabou y duna espacio pa importa trahado di afo.

Si e doño di trabou ta considera cu e trahado no ta bon ta su deber di dune training y formacion. E ta haya cu nan mester ‘busca trahadonan den e mercado laboral local’. Considerando cu nos tin problema social serio, e mandatario ta haya cu un arma importante pa nos resolve e problemanan social ta esun di pone e hendenan bek na trabou.

“Laga nan haya balor bek pa trabou. Laga nan haya amor bek pa soña y tin ambicion sano pa yega leu den bida,” segun e mandatario.