E siman aki gobierno ta spera di por wak un concepto di e ley di parkeer adapta unda lo introduci cobramento di boet pa reemplasa e klem.
Manera ta conoci cu e binimento di Aruparking a crea cierto reaccion tanto positivo como negativo. Un aspecto negativo tin di haber cu e ponemento di klem pa esun cu a parkeer sin paga of cu su tempo di parkeer a pasa of cu no a parkeer bon.
Despues di un accion di comerciantenan localisa den e area di caya principal, prome minister Mike Eman a compromete su mes di suspende e uzo di klem cu ta wordo considera un instrumento afectando nos bishitantenan y hende local segun e. Actualmente nan no ta klem; pero si nan ta tou e auto.
Momento cu e mandatario a anuncia esaki Bon Dia Aruba a entrevista comerciantenan den Caya Betico Croes, y tin cu ta bisa cu e klem no ta e problema cu e Caya ta keto. Tin otro factornan entre otro perdida di poder di compra, cu ta afectando e centro.
Sinembargo gobierno ta sigui cu e plan pa kita e klem. E ta un cambio pa pone base legal pa e automobilista por haya un boet. E ta duna e base legal tambe pa e boet aki por yega na e cas di e persona cu mester hay’e. E mandatario ta spera cu pronto nan por bay parlamento pa por pasa e ley aki.
E prome minister ta bisa cu nos cuadra legal ta permiti pa algo cu ta na beneficio di e ciudadano, gobierno por adelanta riba un cambio di un ley. Pero ora cu ta trata di un peso pa e ciudadano manera ta e caso di ponemento di boet, no por adelanta te ora cu e ta basa den ley.
Otro solucion pa V-car
Igualmente lo bin cu cambio pa e turistanan cu ta core den V-car y ta parkeer den e zona di parkeermeter. Ta wordo constata cu e turistanan pa un motibo of otro no ta consciente cu nan tin cu paga. “E ta hopi fastioso pa nos por duna boet na personanan cu ta bin tanto añanan y cu ta stima nos pais”, sr. Eman ta bisa. Pa tal motibo nan ta pensando riba otro modelo caminda cu na momento cu un hende ta huur un auto e ta paga un suma pa dia caba. Ya caba a wordo menciona un suma di 1 dollar pa dia. Esaki ta duna e V-car e derecho di para den espacio blanco sin worry cu e pagamento pa parkeer.
Area di hotel
Di otro banda, e prome mandatario a bisa cu ainda no tin pensa di implementa e area di parkeer meter den e zona hotelero. “Esey no ta den mente”, y tampoco riba e lista halto di prioridad, e ta bisa. E mandatario a agrega cu nan ta cauteloso ora cu ta trata di temanan cu por afecta salario di nos hendenan.
Minister Benny Sevinger lo drenta den un dialogo hunto cu e hotelnan pa nan tin siguransa cu tin luga di parkeer pa esunnan cu ta traha den hotel. E mandatario a bisa cu nan kier evita di crea henter e discusion cu a surgi na momento cu gobierno a introduci e parkeermeter den centro di ciudad cu no tabatin suficiente alternativa pa esunnan cu no por paga of cu no kier paga y cu tin cu parkeer mas leu.
