(Ret Karibense) – Gobierno kier cuminsa un discusion nacional riba e futuro di e refineria na San Nicolas. Esaki prome minister Evelyn Wever-Croes a bisa.

Aworaki tin 300 trahado den servicio di e refineria ainda trahando. Pero mas cu 300 trahado riba contract nan a manda cas. Prome minister a bisa cu e no ta sorprendi ora Citgo a informa nan a para e trabou. Momento el a drenta gobierno, e ta bisa e tabata skeptico di e trabou cu ya tabatin retraso enorme.

Awor e ta menciona tambe cu e sa di e advertencianan di Merca y Hulanda dirigi na e gobierno anterior di Aruba (gabinete Eman II) riba e riesgonan di un colaboracion cu Citgo. Segun sra. Wever-Croes nan a adverti gabinete Eman II di e sancionnan economico cu na e momento ey ya tabata planea.

E prome minister actual di Aruba ta bisa cu aworaki nan ta evaluando e contracto cu Citgo pa wak si ta posibel pa kibra esaki prome cu 2020. Pasobra pa awor ta mustra cu te na 2020 nan por sinta hunto cu e compania pa discuti e contracto di lease di e refineria y wak si por cambi’e.

Discusion nacional, no referendum
Den e caso cu lo termina e contracto di huur, e prome minister kier cuminsa un discusion nacional riba e futuro di e refineria. Pero e ta afirma cu lo no bin un referendum. Tampoco e kier descarta cu lo por bin un operado nobo sinembargo su preferencia ta pa lo traha riba un pilar economico nobo na e luga di e refineria.

Citgo a bisa gobierno di Aruba cu nan kier lobby cerca e autoridadnan Mericano pa haya un excepcion di e sancionnan pa e facilidad na Aruba. Nan a puntra gobierno di Aruba pa participa den e lobby aki. Pero prome minister a comenta cu nan no ta sinta mucho p’e.

Sancionnan Venezuela
Manera nos a publica tambe Citgo a para temporalmente e trabou di rehabilitacion pa motibo di e sancionnan economico di gobierno Mericano contra Venezuela. Financiamento di companianan na Merca di cual nan doñonan ta Venezolano, ta restringi. Citgo Petroleum y Citgo Aruba ta companianan di PDVSA, e compania madre Venezolano. Gobierno di Merca a haci un excepcion pa Citgo Petroleum pero no pa Citgo Aruba. Asina nan no por ricibi inversionnan di pafo pa por continua e trabou di rehabilitacion di e refineria na San Nicolas.