Consul di Venezuela na Aruba, Alirio de Jesus Mendoza a wordo retira di su funcion diplomatico. E decision aki di e gobierno Venezolano a keda publica den e ‘gazeta’ oficial No. 41.342 di fecha dia 16 di februari ultimo.
Ta asina cu e gobierno di presidente Nicolas Maduro a bin cu e resolucion pa establece e ‘cese de funciones’ di e ciudadano Alirio de Jesús Mendoza Galué, como consul general den e Consulado General di Republica Bolivariana di Venezuela na Aruba.
Igualmente e corant oficial di e gobierno di Venezuela ta informa cu a keda nombra Carlos José Mata Figueroa, como consul general di Venezuela na Aruba. E ta e diplomatico responsabel di administra e sede consular aki. Tin indicacion cu e decision aki a bini for di herarkia di e gobierno central di Venezuela. Tampoco no a wordo divulga ainda si sr. Mata Figueroa a haya su credencial como diplomatico for di Hulanda.
No ta wordo descarta cu e embargo actual di gobierno di Venezuela contra e islanan ABC por ta un forma di presion pa Hulanda y reino Hulandes acredita sr. Mata Figueroa como Consul di Venezuela na Aruba. Casi e mesun historia cu e conocido caso di e Hugo ‘El Pollo’ Carvajal cu nan extradicion pa Merca a wordo nenga. Cuater aña pasa Carvajal a keda deteni temporalmente na Aruba. Pero Hulanda a dicidi di laga Carvajal bay su pais bek, despues cu nan a evalua nan interes na Venezuela.
E unico informacion cu Bon Dia Aruba a haya sa for di fuentenan di Venezuela ta, cu sr. Mata Figueroa ta un ex-militar kende ta gosa di gran confiansa di e gobierno Chavista y Madurista. Casualidad of no, e ta carga un fam conoci na Aruba. E tabata fundado di e compania aereo Lamia. Un avion di e compania aki tabata transporta e team di futbol Chapecoense di Brasil cu a cay accidenta cerca di Medellin, Colombia.
Tambe recientemente sr. Mata Figueroa tabata gobernador y tambe a keda nombra como ‘protector’ di estado di Nueva Esparta, hunto cu personahenan di e bida politico Venezolano manera, entre otro, Francisco Arías Cárdenas, kende a bira protector di estado Zulia, y kende ta un ex-militar y tata di ex-Consul di Venezuela na Aruba, Jesus Arias Fuenmayor.
E decision di kita Alirio Mendoza for di su funcion diplomatico no tabata conoci. Aparentemente e decision aki a bini for di e mesun presidente di Venezuela debi na e crisis diplomatico actual.
Gobierno di Venezuela a bin cu e decision unilateral di cera nan frontera y bin cu un blokeo economico y di pasaheronan contra Aruba y otro islanan manera, Corsou y Bonaire di e reino Hulandes. A pesar di reunionnan y esfuersonan diplomatico haci pa reestablece e relacion bilateral, e embargo of blokeo di e gobierno Venezolano, ainda ta vigente contra e islanan ABC.
